Argita Malltezi, vajza e ish-kryeministrit Sali Berisha është paraqitur mëngjesin e kësaj të enjte në Prokurorinë e Posaçme (SPAK).
“Jam thirrur për çështjen 193/2024, pasi të jap dëshminë timë do të jap një deklaratë për mediat.”, deklaroi shkurtimisht Argita Malltezi për gazetarët para se të futej në godinën e SPAK.
Bëhet fjalë për çështjen që ish-kryetarja e GJKKO, Irena Gjoka i ka kërkuar SPAK më 19 Tetor që të hetojnë deklaratat e Argita Berishës e cila e akuzoi gjyqtaren se është filmuar duke i kërkuar 500 mijë euro një ish-eksponenti të Partisë Socialiste.
“Nga burime joformale dhe të pakonfirmuara, çka do të thotë se nuk e kam parë me sytë e mi. Ajo që dihet nga të gjithë, besoj edhe nga gazetarët, gjyqtarë dhe prokurorë të SPAK, 17 veta rezutojnë në dosjen e Encrochat të përfshirë. 17 veta nga gjyqësori special, përveç të tjerëve. Pyetja që duhet të bëni është pse nuk del kjo gjë? Gjyqtarja e çështjes, Irena Gjoka pretendohet se gjithashtu është në një video, a është e vërtetë, nuk e di, mua më thonë që është në një video të marrë nga një aparat celular i një gazetari të larguar nga Shqipëria, në të cilin ajo rezulton e filmuar duke biseduar me një ish-eksponent të Partisë Socialiste duke negociuar për tarifën që i kërkon prej 500 mijë euro për të mos e futur në grup të strukturuar kriminal. Duhet të na thotë SPAK nëse është apo jo e vërtetë kjo.” tha Argita Malltezi gjatë një konference për shtyp më 23 shtator 2024.
Gjyqtarja Irena Gjoka kërkoi hetime të thelluara nga Prokuroria e Posaçme për këto akuza publike që vajza e ish-kryeministrit ka bërë ndaj saj.
Dyshohet se bëhet fjalë për ish-deputetin socialist Alket Hyseni, pasi të njëjtat akuza ndaj gjyqtares Irena Gjoka ka hedhur edhe kreu i PD-së, Sali Berisha.
“Do t’i shtroj një pyetje gjykatëses bandite me tre mbiemra: A ke ti ndonjë bisedë me Alket Hysenin në të cilën flitet për 500 mijë euro ryshfet për ta hequr nga klasifikimi si grup kriminal.” – ka deklaruar Berisha në një deklaratë për mediat më 23 Gusht 2024.
Kujtojmë se Irena Gjoka ka qenë dhe gjyqtarja në GJKKO për dosjen “Partizani”, ku caktoi masat e arrestit për Sali Berishën dhe dhëndrin e tij, Jamarbër Malltezi.
Në mediat greke u publikua edhe dokumentetet se gjyqtarja Irena Gjoka, e cila ka përdorur dhe mbiermat Maneku dhe Shpata, kishte fshehur një dënim në Greqi, por SPAK nuk ndërmori asnjë hetim ndaj saj, në lidhje me këtë çështje.
