Kristjan Asllani rinovoi me Inter para disa muajsh deri në 30 Qershor të 2028, por kjo nuk duket se është garanci se do ta mbajë në këtë ekip.
Paraqitjet në ndeshjet e fundit dhe sidomos në finalen e Superkupës së Italisë ndaj Milanit sipas mediave italiane kanë rikthyer diskutimin për largimin e tij.
“Corriere dello Sport” shkruan se Asllani nuk po arrin të shkëlqejë kur i jepet mundësia dhe pjesa e dytë e sezonit do të jetë një provë e fortë për të.
“Finalja e Superkupës ka dhënë pak përgjigje qetësuese, qoftë edhe të pjesshme: përveç katastrofës Asllani dhe formës së dobët të Frattesit, iu shtua edhe një paraqitje negative e Zielinskit. Të paktën përpara, Taremi megjithatë ka dhënë shenja jete.” – shkruan “Corriere dello Sport”.
Këtë sezon 22-vjeçari është aktivizuar në 15 takime në të gjithë aktivitetet dhe vetëm në 3 raste si titullar. I parë si zëvendësuesi i Hakan Çalhanoglu, gjen më së shumti hapësirë kur dëmtohet mesfushori turk.
Në dyshim është vendosur edhe Davide Frattesi, i cili pritet të largohet verën e ardhshme. Për Kristjan Asllanin në mediat italiane është përmendur interesimi i Bologna.
