Pse Hotel Ritz një prej markave më të mëdha të hotelerisë në botë, në qendër të Madridit, një prej qyteteve të mëdha dhe të shtrenja të Europës, shitet për thuajse të njëjtën shumë sa një hotel në Tiranë?
Në vitin 2015, operatori i hoteleve luksoze Mandarin Oriental International u bë bashkë me me një grup privat shumëkombësh nga Arabia Saudite për të blerë Hotel Ritz në Madrid për një shumë prej 130 milion eurosh. Sipas medias spanjolle që raportoi këtë transaksion të vitit 2015, Ritz-i i Madridit strehohet në një ndërtesë 105-vjeçare dhe, përveç kësaj ka edhe një veçanti tjetër: ai është një prej 3 të vetmëve Hotel Ritz në Europë , dy të tjerët janë në Paris dhe Londër.
Grupi Ritz ka hotele të tjera, por jo në kategorinë superluksoze, dhe ata njihen si Ritz Carlton.
Politiko.al ka botuar para dy ditësh një lajm ende të pakonfirmuar zyrtarisht, dhe madje të mohuar publikisht nga një prej administratorëve, të shitjes për shumën e 110 milion eurove të Hotel Plazza në Tiranë. Hoteli i hapur para dy vitesh është një prej më të mirëve në Tiranë, ndoshta më i miri, por megjithatë ka vuajtur për mungesë klientësh.
Shuma e raportuar e shitjes, prej 110 milion eurosh, në një kryeqytet të një vendi si Shqipëria, dhe për një hotel që nuk është markë ndërkombëtare të bën kureshtar.
Pse Hotel Ritz, një prej markave më të mëdha të hotelerisë në botë, në qendër të Madridit, një prej qyteteve të mëdha dhe të shtrenja të Europës, shitet për thuajse të njëjtën shumë sa një hotel në Tiranë?
Partia Demokratike ka ngritur dyshime, menjëherë pas qarkullimit të lajmit, se pas shitjes qëndrojnë interesa politike dhe afera të dyshimta financiare që lidhen me qeveritarë të lartë dhe të afërm të tyre.
/Politiko.al/
