Bisedimet për formimin e një koalicioni në Itali kanë dështuar, duke lënë vendin përballë zgjedhjeve të reja ose një qeverie të përkohshme deri në fund të vitit.
Presidenti Sergio Mattarella deklaroi ditën e hënë se ato ishin të vetmet opsione të mbetura, pas një raundi të tretë negociatash të pasuksesshme.
Dy muaj pas zgjedhjeve të 4 marsit, që nuk patën një fitues të qartë, kreu i shtetit i kërkoi liderëve politikë të mbështesin qeverinë teknike, të paktën deri kur të miratohet buxheti në 31 Dhjetor.
“Përpjekja për t’i dhënë jetë një koalicioni mes qendrës së djathtë dhe lëvizjes ‘5 yjet’ rezultoi e pasuksesshme. Propozimi i lëvizjes ‘5 yjet’ për të krijuar një shumicë me Lega Nord nuk gjeti mbështetje, ashtu si mundësia e një aleance mes tyre dhe Partisë Demokratike. Ndërkaq ka qenë gjithmonë e qartë pamundësia e një marrëveshjeje mes qendrës së djathtë dhe Partisë Demokratike. Nuk ka më asnjë shpresë për krijimin e një qeverie përmes një marrëveshjeje politike”, deklaroi Mattarella.
Në një deklaratë publike televizive Mattarella u kërkoi udhëheqësve të partive të pranojnë një qeveri teknike, pasi pranoi se nuk do të kishte marrëveshje koalicion.
“Le të vendosin palët me vullnetin e tyre të lirë nëse duhet t’i japin pushtet të plotë një qeverie … ose zgjedhje të reja në muajin korrik ose në vjeshtë”.
Një qeveri teknike do të përbëhej nga ekspertë të politikave të emëruar nga presidenti.
Ajo do të kishte përgjegjësinë e hartimit të një buxheti për 2019-ën me qëllim të shmangies së efekteve të mundshme “të recesionit”, të një rritjeje të planifikuar të taksave të shitjes më vonë gjatë vitit.
Një qeveri e tillë do të zgjaste deri në fund të vitit dhe pastaj do të shpërndahej përpara zgjedhjeve që do të mbaheshin në fillim të vitit 2019-ës, deklaroi Mattarella.
