Janë zbardhur detajet nga vendimi i marrë në mbledhjen e djeshme të Këshillit të Ministrave, i mbledhur jashtë rendit të ditës, ku u ndryshua buxheti, duke përcaktuar një bonus pranvere për pensionistët.
Ky bonus është konsideruar nga opozita si një manovër elektorale e Edi Ramës për të marrë votat e pensionistëve në prag të zgjedhjeve parlamentare që do të mbahen më 11 Maj, teksa Shqipëria është e fundit në rajon për nivelin e pensioneve.
Sipas raportimit të Ministrisë së Financave, në pranverë do të shpërndajmë 6.3 miliardë lekë, ku pensionistët që marrin pension mujor nën 20 mijë lekë do të marrin një bonus prej 10 mijë lekësh ose 100 Euro. Ndërsa, pensionistët që e kanë pensionin mujor mbi 20 mijë lekë do të marrin një bonus prej 5 mijë lekësh ose 50 Euro.
Gjithashtu do të ketë dhe një shpërblime prej 15 mijë lekësh për familjet me ndihmë ekonomike, personat me aftësi të Kufizuar, si dhe kujdestarët e tyre.
Për bujqësinë, do të alokohet një fond shtesë prej 1.4 miliardë lekësh, ndërsa për bashkitë do të sigurohen 1.6 miliardë lekë për shlyerjen e detyrimeve të prapambetura dhe përmirësimin e shërbimeve publike.
Pra, siç duket Qeveria “hap thesin” në prag të zgjedhjeve dhe duket se qëllimi është i qartë, mbledhja e sa më shumë votave për Partinë Socialiste duke shfrytëzuar burimet shtetërore.
