Gjykata Kushtetuese ka shtyrë për nesër seancën për mandatin e gjyqtares, Holta Zaçaj. Gjykata Kushtetuese u mblodh sot për shqyrtimin e kërkesës së Kryetares së Gjykatës Kushtetuese për deklarimin e mbarimit të mandatit të Zaçajt.
Në njoftim thuhet se gjatë mbledhjes, u administrua praktika e Gjykatës së Lartë, kur Zaçaj ka aplikuar për vendin vakant dhe më pas është zgjedhur si gjyqtare Kushtetuese. Në mbledhje është administruar edhe vendimi i kryetarit të Gjykatës së Lartë për shpalljen e vakancës për zgjedhjen e anëtarit të ri të Gjykatës Kushtetuese.
Më tej thuhet se, gjykata vlerësoi që aktet në fjalë t’i komunikohen gjyqtares Zaçaj, me qëllimin për tu njohur dhe për të vlerësuar paraqitjen e një opinioni me shkrim në lidhje me to.
