Dy aksione njëri pas tjetrit mbrëmjen e djeshme në Treviso. 38-vjeçari që drejtonte makinën e markës së njohur ishte dëbuar nga Italia në muajin shkurt, por u kthye fshehurazi. Karabinierët ndoqën edhe 4 të dyshuar me një “Volkswagen’ që kryenin vjedhje, por pasi lanë çantën me “arsenal”, u arratisën.
Mbrëmjen e djeshme (14 Dhjetor), karabinierët e kompanisë Treviso zhvilluan një operacion kundër krimit dhe veçanërisht bandave të ‘skifterëve’ shqiptarë që bastisin biznese dhe banesa.
Në orën 21:00, në Mogliano Veneto, efektivët kapën një makinë ‘Volkswagen T-Roc’, me ngjyrë të bardhë, e cila më vonë u zbulua se ishte e marrë me qira, me qëllimin për të transportuar ‘skifterët’ që kryenin vjedhje banesash në zonë.
Pasi ka parë efektivët, shoferi nuk ka ndaluar, duke rritur shpejtësinë në “Via Aldo Moro”. Aty mjeti u braktis dhe karabinierët kanë parë se ndodhej më shumë se një person në veturë, që u arratisën në këmbë.
Gjatë arratisjes, të katër personat lanë në rrugë një çantë me mjete të shumta vjedhjeje dhe doreza, të cilat u gjeten më pas nga efektivët dhe u sekuestruan. Hajdutët e dyshuar mundën të humbnin gjurmët, teksa hetimet vijojnë për identifikimin dhe kapjen e tyre, sipas raportimit të medias italiane.
Më herët, në Villorba, ishte arrestuar një 38-vjeçar duke drejtuar një ‘Mercedes Class A’, me precedentë të mëparshëm penale. Ai u arrestua pasi rezultoi se kishte hyrë ilegalisht në Itali dhe po verifikohet nëse ka marrë pjesë në krime. Në shkurt të këtij viti, ai ishte dëbuar nga vendi.
