Kapiteni i Teutës, Blerim Kotobelli, mendon se ka ardhur momenti që Teuta të rikthehet tek fitorja. Sot në orën 16:30, durrsakët presin në “Niko Dovana” kampionët në fuqi të Egnatias.
Kjo skuadër është e preferuar për Teutën në tri sezonet e fundit, pasi ka arritur të marrë rregullisht rezultate pozitive, qoftë në Durrës apo Rrogozhinë. Mbrojtësi “veteran” i Teutës flet fillimisht për barazimin kundër Tiranës.
“Më vjen shumë keq, pasi kemi zhvilluar një ndeshje të mirë në kryeqytet dhe mund të fitonim. Megjithatë, jemi fokusuar te ndeshja e radhës dhe paraqitja e mirë në Tiranë na bën që ta përgatisim ndeshjen kundër Egnatias me të qetë”, theksoi Kotobelli, për të folur më pas rreth pritshmërive që ka për duelin me rrogozhinasit.
“Me Egnatian dihet që është ndeshje shumë e fortë. Do të japim shpirtin në fushë të gjithë, duke shpresuar te tri pikët. Duhet të jemi të gjithë të bashkuar dhe të dalim nga ajo ndeshje me fitore. Teuta i ka të gjithë mundësitë të jetë në pjesën e sipërme të klasifikimit, por si unë dhe të gjithë shokët e skuadrës, shohim ndeshjen e radhës në këto momente që jemi”, deklaroi kapiteni, i cili është kthyer në “xhol” sa i përket pozicioneve që ka luajtur, qoftë në të majtë, ashtu edhe në qendër të mbrojtjes.
“Nuk është se përben problem për mua, unë luaj aty ku ka nevojë ekipi”, përfundoi Kotobelli.
