Sociologu Gëzim Tushi ka komentuar rastin e 14-vjeçarit në Vlorë i cili u kap me armë zjarri dhe qindra fishekë.
Ai u ndal në disa këndvështrime por më së shumti theksoi se ka pasur një deformim të edukimit prindëror në familje duke ndikuar drejtpërdrejtë tek sjellja e fëmijëve.
“Duhet parë në dy anë kjo situatë. Ajo çfarë po ndodh është një deformim i edukimit prindëror në familje, rënia e pushtetit të prindërimit në familje si dhe mungesa e komunikimit apo empatisë emocionale për të formuar adoleshentët, në mënyrë që mos ta kenë mendjen tek krimi dhe arma”, tha sociologu në Euronews Albania.
Gëzim Tushi shpjegoi gjithashtu se në këto raste duhet parë familja dhe struktura e saj.
“Zgjerimi i kriminaliteti minor së pari është i lidhur me strukturën e familjes dhe aftësitë e prindërimit e familjes. Në çdo shoqëri insitucioni më i sigurt dhe më ndikues për adoleshentët dhe fëmijët është familja”, shtoi Tushi.
Sipas tij, fenomeni i pajisjes së fëmijëve me armë të ftohta në shkolla është një problem i madh dhe shqetësues, aq sa duhet duhet vënë një zbulues për ti dalluar këto armë.
Për rastin në fjalë të 14-vjeçarit në Vlorë, sociologu e ka parë pozitiv faktin se prindi nuk ka fshehur rastin dhe se ka vepruar drejtë. Ai cilësoi bashkëpunimi që duhet në rastë të tilla mes të gjithë insitucioneve dhe mekanizmave përkatës
“Në momentin që ndikimi edukativ mbi fëmijët është dobësuar, doemos duhen mekanizmat shtesë komplementare siç janë mësuesit, policia, psikologu, juristi. Këta ndikojnë në shëndoshjen e situatës dhe në zbutjen e krimit minor”, tha Gëzim Tushi.
