Janë zbardhur detaje të reja nga ngjarja e regjistruar në Vlorë, ku një 14-vjeçar u arrestua nga Policia për armëmbajtje pa leje, pasi kishte fshehur një pistoletë dhe 130 fishekë luftarakë tek një motor në një godinë të pabanuar.
Babai i të miturit, Bardhosh Tozaj është proncuar për mediat, ku tha se fillimisht i kishte parë të birit një video ku shfaqej me shokët në mal bashkë me pistoletën, por nuk ishte i sigurt nëse ishte prej vërteti apo lodër.
Ai tha se më pas ka njoftuar mësuesit e shkollës 9-vjeçare “Rilindja” , të cilët kanë njoftuar Policinë, duke vërtetuar se pistoleta nuk ishte lodër, por prej vërteti. Bardhosh Tozaj deklaroi se djali i tij nuk ka pasur probleme më parë, por vetëm zënka në shkollë.
“Pashë një video që ishte shpërndarë mbrëmë në rrjetet sociale, sikur djali im ka qarkulluar në shkollën 9-vjeçare “Rilindja” me një pistoletë, ky është një lajm i rremë. Informacionin policisë ia kam dhënë unë kur pashë videon e djalit tim me shokët në mal me pistoletë. Në shkollë qarkullon një lojë, ku hedhin një shok dhe e presin dhe videot i nxjerrin në TikTok. Është lojë e rrezikshme dhe për këtë arsye, unë isha në një mbledhje me drejtoreshën, mësuesen kujdestare dhe një psikologe. U thashë që kam parë një video, por nuk isha i sigurt nëse pistoleta ishte e vërtetë apo lodër. Ne u takuam me punonjësit e policisë në shkollë, ata panë videon me djalin dhe kuptuan se nuk ishte pistoletë lodër.
Pistoletën e kanë gjetur në një objekt të pabanuar trekatësh, këtu afër shkollës. Jo afër shtëpisë sime, kanë qenë disa shokë që e kanë gjetur, e kanë marrë dhe kanë shkuar në mal, anë bërë video për tiktok, dhe më vonë e kanë fshehur. Arma është gjetur në një objekt të pabanuar, kishin gjetur edhe 3 karikatorë dhe mendohet se mund të ketë edhe municione të tjera.
Djali s’ka pasur probleme, zënka në shkollë ka pasur se 14-vjeç është. Më tregoi videon dhe më tha që është pistoletë lodër, e kam blerë. Në video është djali im me pistoletë, tha e kam gjetur në një objekt trekatësh afër shkollës. Shokët e tjerë nuk janë shoqëruar për momentin.“, u shpreh ai.
