Shpesh herë, futbolli ka treguar se është më shumë se një sport, ndërkohë që rivaliteti njihet vetëm brenda mureve të stadiumit. Rasti i fundit ishte ai me ish-trajnerin legjendar të Mançester Junajtid, Aleks Ferguson, i cili pësoi një hemorragji dhe u detyrua t’i nënshtrohej një ndërhyrjeje kirurgjikale, ndërkohë që e gjithë bota e sportit u solidarizua me teknikun.
Së fundmi, ka reaguar edhe trajneri aktual i Mançester Sitit, Pep Guardiola, i cili ka treguar se ka qenë fat i madh për të që ka njohur personalisht një person si Ferguson, ndërkohë që është solidarizuar edhe me tifozët e “djajve të kuq”. “Për mua ishte fat i madh që pak ditë më parë kisha mundësi të haja një darkë me Fergusonin. Ai është një njeri i madh dhe, si i tillë, besoj se do arrijë t’ia dalë mirë këtë herë. Dua të shpreh mbështetjen time për të afërmit e tij dhe iu jap shumë përqafime gruas së tij dhe familjes së madhe të Mançester Junajtid”, -u shpreh Guariola pas ndeshjes që Mançester Siti barazoi pa gola ndaj Hadërsfilldit.
