Pas 7 sezonesh me fanellën e Juventusit, ku ka luajtur mbi 250 ndeshje dhe realizuar 15 gola, mbrojtësi zviceran Stephan Lichsteiner ka vendosur të largohet nga bardhezinjtë në fund të këtij sezoni.
Tashmë 34 vjeç, ai e sheh se nuk ka shumë hapësira te skuadra kampione e Italisë, ndaj ka vendosur të largohet, gjë të cilën e ka konfirmuar pas fitores 3-1 që Juventusi arriti ndaj Bolonjës.
“Luaj në një nga ekipet më të mëdha në Europë, ku konkurrenca është e madhe. E ardhmja ime është larg Torinos, pasi në fund të sezonit do të largohem. Sezonin tjetër do të luaj në një kampionat tjetër, por ende nuk kam firmosur asnjë kontratë”, tha Lichsteiner.
Lichsteiner ka mbërritur në Torino në vitin 2011 dhe ka hyrë në historinë e klubit bardhezi si lojtari i parë që ka shënuar gol në “Juventus Stadium”, ndaj Parmës.
Në sezonet e para ai ishte i pazëvendësueshëm, por me ardhjen e trajnerit Allegri nuk pati më atë influencë te skuadra, ndërkohë që vitin 2016 nuk u përfshi as në listën e Champions League. “Unë kam ende edhe një titull për të fituar dhe më pas do të largohem. Ky është një ekip i madh, por për në Europë duhet të jetë më i përgatitur mendërisht, në mënyrë që të fitojë në të ardhmen Champions League”, u shpreh mbrojtësi Stephan Lichsteiner.
