Zëvendësdrejtor i Krimit në Policinë e Tiranës, Erion Ismaili ka rrëfyer në emisionin “Top Story” itinerarin që bëri autori i vrasjes së 14-vjeçarit Martin Canit, Mario Përlleshaj.
Ai tha se foton me dorën e plagosur në makinë ia bëri shoku i tij, i cili nuk ishte i përfshirë në ngjarje, gjatë rrugës kur po shkonin për në spital.
“Ka shkuar me monopatinë tek qendra shëndetësore, më pas kanë marrë taksi, komunikon me babanë dhe ai i thotë të shkojë tek spitali ushtarak , foton e ka bërë në taksi, ia ka bërë një shoku i vet, nuk ka qenë i përfshirë në konflikt, e ka takuar në rreth rrotullimin tek Avni Rustemi. Ka një foto që tregon grushtin dhe dorën”, tha Ismaili.
Gjithsesi, duhet theksuar fakti se autori nuk ka shkuar asnjëherë në spital shtetëror, pasi ai deri në momentin kur u transferua në burgun e të miturve në Kavajë ka qëndruar në një spital privat.
Ndërkohë zëvendësdrejtori i Krimit në Policinë e Tiranës dha detaje dhe në lidhje me sherrin mes viktimës dhe të miturit.
“Thika që është postuar është tjetër. Nuk është ajo. Nga ekzaminimi i thikës ka mbetje të gjakut, po bëhen ende ekzaminime dhe së shpejti do dalim në një përfundim. Ajo çfarë ne themi në komunikatën e policisë është e vërtetë. Procesi hetimor nuk ka mbaruar, vazhdon. Është spekuluar”, tha ai.
