Një 41-vjeçar, i shpallur në kërkim për prodhim dhe shitje narkotikësh, si dhe armëmbajtje pa leje, është arrestuar nga policia e Durrësit. Ai ishte nën hetim nga gjykata e Durrësit, e cila kishte lëshuar një urdhër ndalimi për akuzën e prodhimit dhe shitjes së narkotikëve.
Në një operacion të realizuar në korrik 2024, gjatë kontrolleve në banesën e tij, u gjet një armë zjarri pistoletë që ai e mbante pa leje.
“Si rezultat i kontrolleve të bazuara te informacionet e inteligjencës policore, Forca e Posaçme Operacionale dhe Seksioni për Hetimin e Narkotikëve të Drejtorisë Vendore të Policisë Durrës lokalizuan, kapën dhe vunë në pranga shtetasin e shpallur në kërkim D. M., 41 vjeç.
Për të, Gjykata e Durrësit ka nxjerrë urdhër ndalimi për veprën penale “Prodhimi dhe shitja e narkotikëve”. Gjithashtu, nga kontrollet për ekzekutimin e urdhrit, në muajin korrik 2024, Policia gjeti në banesën e 41-vjeçarit, 1 armë zjarri pistoletë që posedohej pa leje.”-njofton policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
