Ukraina do të humbasë luftën e saj kundër Rusisë nëse Shtetet e Bashkuara ndërpresin fondet ushtarake për Kievin. Kështu u shpreh presidenti ukrainas Volodymyr Zelensky në një intervistë për Fox News.
“Nëse ata presin ndihmën, mendoj se do të humbasim. Ne do të luftojmë. Ne kemi prodhimin tonë, por nuk mjafton për të fituar epërsi. Dhe mendoj se nuk mjafton për të mbijetuar”, tha presidenti ukrainas.
Presidenti i sapozgjedhur i SHBA-së, Donald Trump është skeptik për miliardat që administrata e Joe Biden i ka dhënë Ukrainës që nga fillimi i pushtimit rus në vitin 2022. Manjati ka premtuar vazhdimisht se do t’i japë fund luftës, por nuk ka arritur të japë detaje se si do të bëje këtë.
“Uniteti midis Ukrainës dhe Shteteve të Bashkuara është gjëja më e rëndësishme. Trump mund të ndikojë në Vladimir Putin për t’i dhënë fund luftës, sepse ai është shumë më i fortë se presidenti rus”, shtoi Zelensky për Fox.
Putini “mund të jetë i gatshëm t’i japë fund kësaj lufte, por ai varet edhe më shumë nga Shtetet e Bashkuara të Amerikës: Putini është më i dobët” se SHBA, tha Zelensky.
Ndërkaq presidenti amerikan Joe Biden ka autorizuar furnizimin me mina kundër personit në Ukrainë. Këtë e raporton Washington Post, duke cituar disa burime. Masa do të forcojë mbrojtjen e Kievit kundër avancimit të trupave ruse.
Drita jeshile vjen pas autorizimit të Shtëpisë së Bardhë për Ukrainën që të përdorë raketa me rreze të gjatë për të goditur Rusinë. Minat e autorizuara, sipas një zyrtari të administratës amerikane, janë ato që vetëshkatërrohen ose humbasin ngarkesën e tyre, duke reduktuar rrezikun për civilët. Kievi është zotuar të mos i përdorë ato në zona me popullsi të dendur.
Agjencia ruse e lajmeve Tass thotë se ka marrë konfirmimin nga Pentagoni se administrata amerikane ka autorizuar “përdorimin e minave kundër personit në Ukrainë”.
