Kryeministri Edi Rama ka reaguar përmes një komenti në rrjetet sociale lidhur me deklaratat e Partisë Demokratike, pas dorëzimit të mandatit nga Saimir Tahiri. Kryeministri nuk i përmend emrin Tahirit, ndërsa shkruan vetëm inicialet e tij ST, pak a shumë e njëllojtë me komunikatat për shtyp që përdor policia e shtetit, në rastet e ngjarjeve kriminale.
Me një gjuhë të ashpër, Rama shkruan “ç’është kjo opozitë pikë e vrer pas largimit të ST?”.
“Ç’është kjo opozitë pikë e vrer pas largimit të ST e arrestimit të kokave të trafikut të kokainës në Gjermani&Spanjë falë bashkëpunimit tonë ndërkombëtar? Sa gjynah më vjen për ata që ende u besojnë këtyre vulëhumburve pa atdhe. Po duan s’duan këta Shqipërinë do ta bëjmë.
Dhe nuk ka mbaruar jo, të tjera do pasojnë në javët që vijnë e jo se e kërkon Gjermania a bota,po se ne themi atë që bëjmë e bëjmë atë që themi! E jemi ne e askush tjetër që mund ta kalojë detin që ndan të thënat nga të bërat, sado baltë të na hedhin dhe zjarre marazi të ndezin”, shkruan Rama.
