Ditën e nesërme, rreth orës 08:00 anija “Moliva” me 102 kontejner të ngarkuar me mbetje të dyshuara të rrezikshme do të ankorohet në portin e Durrësit, pas disa ditëve të qëndrimit në radën portuale, pas vendimit për sekuestro nga ana e Prokurorisë.
Pas ankorimit, do të kryhet procedura e shkarkimit të 102 kontejnerëve në kalatë dhe transportimi i tyre jashtë hapësirave portuale, në një zonë të konsideruar të sigurt nga autoritetet.
Vendimi është mare pas një mbledhje te autoritetit portal me policinë te zhvilluar sot, ku është gjetur dhe një vend për evadimin e tyre, që do të administrohet nga organet ligjzbatuese dhe Agjencia e Administrimit të Pasurive të Sekuestruara dhe të Konfiskuara.
Nuk dihet vendi ekzakt i shkarkimit të mbetjeve, por sipas burimeve bëhet fjalë për vendqëndrim larg zonave të banuara.
Sipas vendimit të dy prokuroreve të Durrësit Suela Beluli dhe Mediana Meta, mbetjet e sekuestruara do të depozitohen në një vënd të sigurtë, përsa i përket sigurisë mjedisore dhe asaj fizike, si dhe do të monitorohen 24 orë me kamera.
Më pas pritet të procedohet me marrjen e kampionëve nga secili kontenjerë dhe dërgimin e tyre në një laborator të specializuar.
Anija me mbetjet e refuzuara nga autoritetet tajlandeze mbërriti në Durrës më 28 tetor. Prej më shumë se 10 ditësh anija ndodhet në radën e portit.
Pluhuri në kontejner, i njohur me siglën EAF, dyshohet se përmban përqindje të lartë metalesh si plumbi dhe kromi dhe mbetje të tjera kimike që shkaktojnë kancer.
Eksporti i dyshuar i mbetjeve të rrezikshme nga Shqipëria u denoncua më 5 gusht nga organizata mjedisore “Basel Action Network”, e cila ngriti alarmin se një anije gjigante kontejnerësh e linjës “Maersk” u zhduk në fund të korrikut nga radarët afër Cape Town në Afrikën e Jugut, pas një sinjalizimi të bërë nga ajo tek autoritetet vendase.
Tajlanda, destinacioni i mbërritjes, refuzoi importin pas sinjalizimit për mbetjet e rrezikshme, të cilat ishin nisur nga Durrësi në fillim të korrikut. Deri më tani, Qeveria ka tentuar ta fshehë përgjegjegjësinë e saj.
