Me Rey Manaj dhe Brojën të dëmtuar, lajmi i mirë për Sylvinho-n është forma e shkëlqyer që po kalojnë dy sulmuesit kuqezi, Myrto Uzuni dhe Ernest Muçi, dy lojtarët më pak të preferuar të tij.
Me shumë klas në këmbën e tij, Muçi është rikthyer jo vetëm titullar, por dhe protagonist absolut te Besiktas.
Pas kryeveprës të realizuar pak ditë më parë, Muçi gjeti sërish rrugën e rrjetës, këtë herë në sfidën kundër Kasimpasa. Muçi tregoi nuhatje preh “bomberi” duke ndjekur mirë aksionin dhe të shtyllën e dytë dërgoi topin në rrjetë. Për fat të keq, goli i Muçit nuk i shërbeu Besiktas pasi vendasit pësuan një humbje 1-3 brenda në shtëpi.
Një formë të shkëlqyer po kalon edhe Myrto Uzuni. Sulmuesi kuqezi realizoi një perlë të vërtetë këtë javë, një gol për katalog, duke iu afruar me tre gola rekordit si golashënuesi më i mirë në historinë e Granada-s. Ky ishte goli i tij i 6-të këtë sezon.
Tashmë pritet të shihet se si do të jetë qasja e Silvinjos me dy lojtarët të cilët janë edhe më pak të preferuarit në skemat e tij. Shqipëria do të luajë më 16 dhe 19 nëntor përkatësisht ndaj Republikës Ceke dhe Ukrainës në ndeshjet e vlefshme për Ligën e Kombeve.
