Policia e Korçës ka bërë një tjetër operacion gjatë natës së kaluar dhe në orët e para të mëngjesit të sotëm, në vijim të operacionit të pak ditëve më parë, ku u zbulua një magazinë për përpunimin e kanabisit në fshatin Voskop.
Burime për mediat bëjnë me dije se janë ekzekutuar dhe 6 masa të tjera sigurie të vendosura nga Gjykata e Korçës dhe të lëshuara nga Prokuroria, pas një hetimi 3 mujor të kryer në bashkëpunim me Policinë.
Gjatë kësaj periudhe janë siguruar prova që 6 personat e arrestuar janë përfshirë më aktivitetin e trafikut të lëndëve narkotike.
Sipas po të njëjtave burime janë bërë kontrolle në banesa, lokale e gjithashtu vende ku të arrestuarit dyshohet se shisnin lëndën narkotike.
Policia ka sekuestruar gjithashtu edhe sasi të vogla lëndësh narkotike ndërkohë pritet një informacion më i detajuar nga policia e Korçës në orët në vijim.
Kujtojmë se në një magazinë në perfieri të fshatit Voskop në pronësi të Andon Demirsha, Policia gjeti 195 kg lëndë narkotike kanabis sativa (bimë në proces tharjeje) dhe pajisje që shërbenin për tharjen dhe përgatitjen e lëndës narkotike për shitje.
Në kuadër të këtij operacioni u arrestua pronari i magazinës Andon Demirsha nga fshati Voskop, Gentian Guri nga Tirana, Anesti Bruda nga fshati Bulgarec dhe Redion Hamitaj nga Cërriku.
Gjithashtu, në ambientet e magazinës, u kapën në flagrancë dhe tre gra, që merreshin me përgatitjen e kanabisit, për të cilat nisi procedimi në gjendje të lirë, për veprën penale “Moskallëzimi i krimit”.
Si organizator të kësaj veprimtarie kriminale, Policia e Korçës ka shpallur në kërkim Santilano Duçin, 38 vjeç, banues në fshatin Voskop. Gjatë kontrollit në banesën e tij, uniformat blu gjetën të kultivuara dy bimë narkotike, si dhe sasi të vogla të lëndëve narkotike kokainë dhe kanabis.
Në kuadër të operacionit të koduar “Voskopi”, uniformat blu sekuestruan edhe 1 armë zjarri pistoletë, një sasi kokaine, 1 leje drejtimi false, 7 celularë, 1 automjet, 1 pasaportë, 3 karta SIM dhe një shumë eurosh.
Dyshohet se kanabisi në magazinë në fshatin Voskop është sjellë nga një tjetër zonë, jashtë Qarkut të Korçës. Hetimet po vijojnë nëse ka persona të tjerë të përfshirë nga qarku juglindor dhe qarqe të tjera që dyshohet të ketë ardhur lënda narkotike.
