Buxheti i Shtetit për vitin e ardhshëm do të jetë në shifrën e 822.7 miliardë lekëve apo rreth 8.2 miliardë euro.
Sipas draftit të pr.buxhetit për vitin 2025 të zyrtarizuar nga Ministria e Financave, të ardhurat priten të jenë 7.5 miliardë euro, shpenzimet, 8.2 miliardë euro dhe deficiti 680 milionë euro. Në draft parashikohe që Shqipëria të emetojë 650 milionë euro Eurobond.
Buxheti për vitin e ardhshëm do të jetë rreth 4 % më i lartë se buxheti i këtij viti dhe i rritur me mbi 20 % krahasuar me atë të vitit 2022.
Pavarësisht rritjes së buxhetit të shtetit, opozita vazhdimisht ka denoncuar se pjesa më e madhe e tij shkojnë në duart e disa “klientëve” të përhershëm të Qeverisë dhe nuk shkon për rritje rrogash dhe pensionesh.
Buxheti i vitit të ardhshëm pritet të jetë i orientuar kryesisht tek investimet në infrastrukturën rrugore dhe hekurudhore dhe mbrojtjen ushtarake. Ministria e Shëndetësisë dhe Mbrojtjes Sociale është institucioni që do të marrë pjesën më të madhe “të tortës” së buxhetit, gati 10 %, ndjekur Infrastruktura dhe Energjia, Kultura Ekonomia dhe Inovacionit dhe Arsimi dhe Sporti.
Mbështetja buxhetore do të rritet edhe për Ministrinë e Bujqësisë dhe Zhvillimit Rural dhe atë të Mbrojtjes.
Sipas propozimit të Partisë Socialiste,më 4 nëntor do të nisë diskutimi për Buxhetin e Shtetit për vitin 2025. Më 18 nëntor do të miratohet në Kuvend në parim, ndërsa me 2 dhjetor do të miratohet nen për nen.
