Federata Angleze e Futbollit (FA) konfirmoi të mërkurën se Thomas Tuchel është emëruar trajner i ri i kombëtares së “Tre Luanëve”.
Gjermani ka nënshkruar kontratë 18-mujore, deri në fund të Botërorit 2026, që do të mbahet në SHBA, Kanada dhe Meksikë.
Tuchel pason kësisoji Gareth Southgate dhe do ta fillojë punën me “Tre Luanët” më 1 janar 2025, së bashku me asistentin Anthony Barry.
Ndërkohë Tuchel ka dhënë deklaratën e parë si trajner i Kombëtares angleze duke u shprehur i lumtur ndërsa e quan si privilegj të madh drejtimin e Anglisë.
“Jam shumë krenar që më është besuar drejtimi i kombëtares së Anglisë. Kam ndjerë prej kohësh një lidhje personale me futbollin në këtë vend, i cili më ka dhënë disa momente të pabesueshme tashmë. Të kem mundësinë të përfaqësoj Anglinë është një privilegj i madh. Mundësia për të punuar me këtë grup lojtarësh të veçantë dhe të talentuar është shumë emocionuese”, theksoi Tuchel fillimisht.
Megjithatë ka qenë çështja e himnit anglez ajo që ka bërë shumë të flitet në mediat e huaja, teksa tekniku gjerman ka thënë se nuk e ka detyrim ta këndojë.
“Kam biseduar më shefin e Federatës së Futbollit dhe më ka thënë se nuk e kam për detyrim ta këndoj. Është një vendim personal dhe të them të drejtën ende nuk kam vendosur se si do të veproj. Një gjë është e sigurt, himni anglez është prekës”, tha Tuchel.
