Nga Boldnews.al
Kryeministri Edi Rama gjatë fjalës së tij në Asamblenë e PS-së habiti jo pak kur i mori me radhë të gjithë problemet dhe në fund doli me një konkluzion: Fajin e kanë disa ministra e zyrtarë të lartë për keqeverisjen, por vetë tentoi të dalë i pastër, madje një “proletar”, që mendonte vetëm për të mirën e popullit. Nëse Ramës do i hiqej figura dhe zëri, duke ia marrë të shkruara fjalët që tha, me shumë gjasë shumëkush do mendonte se ishte shkrimi i një analisti kritik me qeverinë. Por jo, ai është vetë Rama… Kryeministri po ndjek taktikën e vjetër, duke i lënë përgjegjësinë tjetrit.
Gjatë muajve të fundit të mandatit të parë, nisi të sulmojë aleaten e qeverisëse Lëvizjen Socialiste për Integrim. Të gjithë problemet ia atribuoi LSI-së. korruspionin, arrogancën, mungesën e vizionit, papunësinë, tejfryrjen e administratës, e çdo të zezë tjetër në vend ia kaloi LSI-së. Kërkoi që në mandatin e dytë shqiptarët t’i jepnin një votë domethënëse, për të qeverisur i vetëm. Ashtu ndodhi, por tashmë Rama duke pasur bilance skandaloze me ekonomi të rrënuar, taksa e tarifa të rritura, arrogancë të nëpunësve të administratës, revolë popullore dhe korrupsion në nivele të larta, po mundohet të gjejë sërish fajtorë. Duke mos pasur më të pasojë fajin tek partia tjetër, problemin e ka gjetur te disa ministra apo zyrtarë të lartë të cilët nuk po i përgjigjen kërkesave të të “pastrit” Edi Rama.
“Pse thonë njerëzit që ne qeverisim me arrogancë? Cila pjesë e qeverisjes sonë konsiderohet arrogante sepse është e drejtë, sepse ne bëjmë reforma të dhimbshme dhe cila pjesë e qeverisë është arrogante me njerëzit. Këtë ne duam ta ndajmë. Kukësi ishte një mësim shumë i madh për të kuptuar përgjegjësinë tonë dhe për të kuptuar çfarë ne nuk bëmë si duhet dhe çfarë duhet të bëjmë në vijimësi”-deklaroi kryeministri, duke pranuar se arroganca është më e pakëta që mund të etiketohet kjo qeveri. Në fjalimin patetik e nisi me Elisën dhe e mbylli me gjoja “kërcënime” se në shtator disa ministra edhe mund të mos jenë më nëse nuk rrisin performancën e tyre.
“Ndryshime në Qeveri në shtator nëse duhet bërë, do të shohim cilët ministra, ministre, cilët nuk janë në lartësinë e kësaj nevoje, jo thjesht të tregojnë shifra e statistika, por të kenë vendin e tyre në mendjen dhe zemrat e atyre që na kanë dhënë besim. Do shohim cilët anëtarë të partisë do të largohen nga kryesia dhe cilët janë të rinjtë që duhet të vijnë, si ka punuar sekretariati dhe cilët do vijnë, cilët janë kryetarët e PS që do të ikin, detyra kryesore është bashkëqeverisja”, tha Rama. Në këtë mënyrë ai nuk zgjidhi asnjë çështje, nuk ndryshoi asnjë formë të qeverisjes, pasi gjithçka e ka zgjedhur vetë. Thjesht bëri propagandë duke i lënë përgjegjësinë të tjerëve, me shpresën se edhe këtë mandate qytetarët do “peshkohen” nga patetizmat e kryeministrit: Ai është i drejtë, por nuk e di çfarë ndodh me të tjerët”…
