Fatmir Xhafaj po bëhet familjarisht gati të aplikojë për “strehim social” tek Erion Veliaj pasi sipas deklarimeve të pasurisë në ILDKPI, ish-ministri rezulton “lypës”.
Socialisti i vjetër i klanit të bashkisë Tiranë, ka marrë kredi 100,000€ për blerjen e një shtëpie dhe 29,000€ borxh për blerjen e një makine, teksa ai tani mbijeton vetëm me pagën e tij si deputet e cila nuk i del as për t’u ushqyer.
Mimoza, gruaja e Xhafajt rezulton se punon si notere, por ajo ka deklaruar se fiton vetëm 70-90€/muaji.
Çuditërisht Moza me pagë më pak se 1000€ muaji deklaron se posedon 10 apartamente, 3 lokale, 2 zyra dhe 3 garazhe në Pogradec, të cilat thotë se i ka përfituar në këmbim të tokës ku janë ndërtuar pallatet, por pa deklaruar vlerat e tyre.
Ajo ka shitur disa prej këtyre pronave për një total prej 108 MLN Lekë të vjetra, por nuk ka deklaruar se si janë përdorur këto të ardhura. Për pronat e tjera, nuk ka treguar nëse i zotëron ende apo jo.
Vajza e madhe e Xhafës, Aulona ka pagë mujore 2500€ si punonjëse e bankës Intesa San Paolo por çudia qëndron në faktin se ka qarkulluar mbi 100 MLN Lekë për shpenzime personale. Ajo ka deklaruar të ardhura shtesë prej 43,000€ nga burime që nuk i bën të ditura, si dhe 10,000€ dhuratë nga prindërit “e varfër”.
Ajo ka marrë një borxh prej 394 MLN Lekësh në nëntor të vitit 2022, prej të cilave ka shlyer 94 MLN Lekë brenda vitit, por pa treguar nga kush i ka marrë këto para dhe me çfarë të ardhurash i ka shlyer. Ndërkohë ka blerë një apartament me vlerë 376 MLN Lekë dhe një garazh me vlerë 18 milionë lekë, duke pretenduar se këto janë të ardhura nga kursimet e saj.
Vajza tjetër e Xhafës, Amantia, ka deklaruar të ardhura prej 62 mijë e 688 euro në vit pagë në një kompani të quajtut “Mutares SE+CO.KgaA”, për të cilën nuk ka të dhëna të detajuara. Ajo gjithashtu ka hapur një biznes së bashku me bashkëshortin e saj, i cili ka raportuar humbje prej 467 mijë Lekë./ JOQ Albania
