Koço Kokëdhima, i cili sot drejton partinë Zgjidhja, ndërsa më parë ka qenë deputet i PS-së, ka komentuar vizitën e Kryeministrit Edi Rama në Berlin, duke theksuar se Kreut të Qeverisë i ranë puplat.
Kokëdhima shprehet se Gjermania i kërkoi Ramës dorëzimin e Saimir Tahirit, ushtarit të tij që kanabizoi vendin si dhe ia bëri të qartë se është në dijeni të kapjes së shtetit e korrupsionit galopant.
“Ndodhi ajo që pritej. Merkel e tha troç se “çelja e negociatave kërkon plotësimin e një numri parakushtesh”.
Ramës i është kërkuar që të dorëzojë ushtarin e tij, që komandoi kanabizimin e vendit, Saimir Tahirin. I është bërë e qartë se gjermanët janë në dijeni për korrupsionin galopant të ministrave të tij dhe kapjen e shtetit nga krimi i organizuar.
Edhe aleatët e Partisë Socialiste në Internacionale, i thanë të njëjtën gjë. Ministri për Evropën, Michael Roth, ia bëri të qartë, ”se reforma gjyqësore pa një proces kundër ish-ministrit të brendshëm, nuk mund të bëhet”.
Të gjitha këto parakushte të artikuluara në Berlin, tregojnë se sa të drejta kanë qenë tezat dhe qëndrimet e partisë ZGJIDHJA për Rilindjen dhe qeverisjen e saj të kriminalizuar”, shkruan Kokëdhima në rrjet.
