Nga Boldnews.al
Mëngjesin e datës 7 gusht 2016, trupi i të miturit Ardit Gjoklaj, u gjet i pajetë poshtë një grumbulli mbeturinash, në landfillin e Sharrës. Ai ishtë shpërfytyruar për shkak të goditjes nga një mjet i rëndë.
Prej mëse një muaji, 17-vjeçari punonte në vend-grumbullimin e mbetjeve urbane, i joshur nga deklaratat publike të Kryetarit të Bashkisë së Tiranës, Erion Veliaj, i cili premtonte kushte optimale në këtë landfill.
Rreth 4 muaj para vdekjes tragjike të Arditit, “Lali Eri” kishte propaganduar impiantin më të ri të kompanisë “3R”, me administrator një eksponent të lartë të Partisë Socialiste, Edurim Teqja.
“E mira (e ndërtimit të landfillit) është punësimi i njerëzve në përputhje me të gjitha rregullat, të cilët paguajnë edhe sigurime shoqërore. Kjo është jashtëzakonisht e rëndësishme, ndaj dhe më vjen mirë që sot këtu punësojmë mbi 200 qytetarë” u shpreh Veliaj gjatë një vizite në landfillin e Sharrës, në datë 17 mars 2016.
Por, vetëm pas 4 muajsh, ky deklarim pompoz rezultoi me pasojë tragjike për jetën e Ardit Gjoklaj. Ai u godit për vdekje nga një mjet i rëndë transportues në mes të natës, për shkak të mungesës së plotë të kushteve të sigurisë.
Hetimi i Prokurorisë së Tiranës për vdekjen e Arditit, vërtetoi se deklaratat publike të Erion Veliajt jo vetëm ishin mashtrime, por edhe me pasoja të rënda për jetën e punonjësve në atë landfill.
“Boldnews.al” ka siguruar dosjen e plotë hetimore, në të cilën janë detajuar të gjitha shkeljet e kompanisë “3R”, por që nuk u vlerësuan nga ana e gjykatës së Tiranës. Kjo e fundit shpalli të pafajshëm dy personat e vetëm të akuzuar, përgjegjësin e turnit Dëfrim Hakrama dhe eskavatoristi Edmond Kollari.
Ja në cilët konkluzione ka arritur Prokuroria e Tiranës, lidhur me përgjegjësinë e kompanisë së Edurim Teqjas në rastin e vdekjes së Ardit Gjoklaj:
“Rezulton se puna e kryer në landfill nga shtetasi Ardit Gjoklaj kërkon zbatimin e rregullave të sigurimit e të mbrojtjes në punë dhe të sigurimit teknik, të cilat nuk janë respektuar, e si pasojë, ka ardhur edhe vdekja e tij, e ndodhur në vendin e punës”, thuhet në dosjen e Prokurorisë së Tiranës, e cila ka detajuar detyrimet ligjore që ka pasur kompania dhe mangësitë e konstatuara në aktivitetin e saj në landfillin e Sharrës.
Në vijim të këtij cikli, “Boldnews.al” do të publikojë shkeljet e rënda që kompania ka kryer në punësimin e paligjshëm dhe në mungesën e trajnimit të Ardit Gjoklajt, pasojat e të cilit ishin fatale për 17-vjeçarin që besoi në publicitetin e Erion Veliajt.
Lexoni edhe:
“Drejtësia e re”/ Si po mbrohen përgjegjësit për vdekjen e Ardit Gjoklaj
