Lirohet Fredi Beleri

Fredi Beleri ka fituar lirinë rreth një muaj pasi u mbajtën zgjedhjet e reja në Himarë, ku kandidati i PS-së, Vangjel Tavo, u shpall fitues.

Eurodeputetit i mbeteshin edhe 6 javë për të kryer dënimin.

Lajmin e lirimit të eurodeputetit e ka konfirmuar avokati i tij, Geni Gjyzari i cila tha për mediat: “E pranoi kërkesën gjykata, urdhëroi lirimin para kohe, i mbeteshin  edhe 6 javë, respekte për gjykatën, lirimi para kohe me kusht, dy muaj i kishin mbetur. Pronari që i ka çelësat e burgut dha leje pas zgjedhjeve që të dali”.

Beleri është dërguar në burgun e sigurisë së lartë në Fier për përfundimin e procedurave të nevojshme dhe më pas do të lirohet.

• Medat greke reagojnë pas lirimit me kusht të Belerit

Lirimi me kusht nga burgu i Fredi Beleri është pasqyruar edhe në mediat në Greqi, të cilat shkruajnë se tashmë eurodeputeti do të kryerje pa asnjë pengesë detyrat e tij në Parlamentin Evropian.

“Kërkesa e eurodeputetit të Demokracisë së Re, Fredi Beleri, për lirimin nga burgu është pranuar sot.

Eurodeputeti i Demokracisë së Re, i cili qëndroi në burg për 16 muaj, kishte bërë kërkesën përkatëse që në korrikun e kaluar ashtu siç i takon sipas ligjit shqiptar pasi kishte kryer 2/3 e dënimit.

Pas këtij vendimi Fredi Beleri do të mund të kryejë pa ndërprerje detyrat e tij në Parlamentin Evropian”, shkruan Protothema.

• Zgjedhja e Belerit eurodeputet, pavlefshmëria e mandatit dhe zgjedhjet e 4 gushtit në Himarë

Fredi Beleri u zgjodh në qershor të këtij viti në postin e deputetit të Parlamentitn Europian nga partia “Demokracia e Re” e kryeministrit grek Kyriakos Mitsotakis. Ai arriti të merrte 237 mijë vota, duke qenë eurodeputeti i katërt më i votuar në shtetin helen.

Në kohën kur u zhvilluan zgjedhjet, ai ndodhej në burg, i arrestuar që më datë 12 maj 2023, dy ditë para zgjedhjeve lokale, teksa kandidonte për kreun e Bashkisë së Himarës. Ai u dënua me dy vite burg nga Gjykata e Posaçme e Apelit, duke e shpallur fajtor për krime zgjedhore, teksa mandati i tij i fituar u shpall i pavlefshëm nga Komisioni Qëndror i Zgjedhjeve.

Gjatë çdo seance, Fredi Beleri e ka konsideruar arrestimin dhe dënimin e tij si politik, teksa ka akuzuar Prokurorinë se ka sajuar faktet dhe provat kundër tij.

Burgosja e Belerit u parapri nga sulme të forta nga kryeministri Rama në fushatë, ku ai paralajmëroi se do të merrej personalisht me kandidatin e PBDNJ-së në Himarë. Për të çuar para porosinë e Ramës u angazhuan forcat operacionale të policisë, prokuroria dhe gjykata e Vlorës dhe më vonë SPAK dhe GJKKO që e mbajtën në burg kandidatin e opozitës, edhe pse i infiltruari pranoi se ishte paguar nga policia për të përgjuar Belerin.

Arrestimi i Fredi Belerit shkaktoi tensione të ashpra mes Athinës dhe Tiranës, ku Greqia e ka konsideruar si një arrestim politik, po ashtu edhe si opozita në vendin tonë. Fredi Beleri u bë i vetmi kandidat në Shqipëri që zgjidhej në një post publik ndërsa ishte në qeli.

Komisioneri Shtetëror i Zgjedhjeve, Ilirjan Celibashi shpalli më datë 5 korrik të pavlefshëm mandatin e Fredi Belerit si kryebashkiak i zgjedhur i bashkisë Himarë. Celibashi argumentoi në mbledhjen e KQZ-së se në kushtet ku ndodhet Beleri, ligji i dekriminalizimit e ndalon që të kandidojë për postin e kryebashkiakut dhe jo më për ta ushtruar funksionin.

Më 4 gusht u mbajtën zgjedhjet në Himarë ku kandidati i PS-së, Vangjel Tavo u zgjodh kryetari i ri i Bashkisë së Himarës. Vangjel Tavo ka siguruar fitoren me 1477 vota më shumë se rivali i tij në garë, Petro Gjikuria.

Opozita denoncoi faktet se si e gjithë administrata shtetërore ishte e përqëndruar në Himarë. Sipas opozitës, Edi Rama e vodhi fitoren edhe në Himarë ashtu siç ka bërë në të gjithë Shqipërinë.

Mbi 6000 qytetarë nuk u lejuan të votonin në zgjedhjet e 4 Gushtit për shkak të ID të skaduara. Opozita e ka cilësuar akt anti-Kushtetues përjashtimin nga e drejta e votës të qindra qytetarëve për shkak të skandencës së dokumenteve të identifikimit.

Përsa i takon zgjedhësve në krahasim me vitin 2023 kemi 252 zgjedhës më shumë. Nga viti 2021 deri në 2023 kur del lista për zgjedhjet vendore rezultuan 8 votues më pak ndërkohë para një viti deri më sot kemi 252 më shumë dhe 331 transferime nga bashkitë e tjera jo vetëm për të jetuar por edhe për të votuar.