29 vjeçari, Admir Dervishi gjatë seancës në gjyq është rrëfyer për krimin e tij ndaj gruas, Ida Dervishi.
“Nuk kam dashur ta vras Idën. Nxora armën, sepse bëmë një sherr atë ditë, u kapëm me fjalë dhe ajo më tha diçka që më fyeu. Isha i nxehur kur nxora armën dhe doja ta qëlloja nga këmbët nga inati”, këto kanë qenë fjalët e oficerit të Gardës së Republikës.
Pasi Prokuroria shpjegoi se gardisti kishte qëlluar gruan në sy të fëmijëve me armën e punës, Gjykata e pyeti vetë të pandehurin. Gjyqtarja i kërkoi të arrestuarit “nëse kishte diçka për të thënë në lidhje me akuzën dhe me ngjarjen”. Oficeri i Gardës së Republikës në mënyrë të përmbledhur ka thënë se ishte inatosur keq me gruan dhe kishte nxjerrë armën. Ai ka pretenduar se në një moment gjaknxehtësie ka dashur ta qëllojë drejt këmbëve, por më pas nuk e mban mend çfarë ka bërë.
Hetimet në fakt kanë treguar të kundërtën, siç tha Prokuroria, e cila theksoi se vrasja ishte rrjedhojë e një debati të mëparshëm mes viktimës e autorit, dhe jo diçka e ndodhur aty për aty. Për këtë arsye Prokuroria kërkoi që gardisti të mbahet në qeli pa afat për vrasjen e të shoqes Ida Dervishi.
Seanca
Prokuroria për Krime të Rënda kërkoi caktimin e masës së sigurisë “arrest me burg”, e cila u pranua nga Gjykata, për gardistin Admir Dervishi, i dyshuar për veprën penale të “Vrasjes për shkak të marrëdhënieve familjare”. Në këtë ngjarje mbeti e vdekur me armë zjarri bashkëshortja e tij, Ida Dervishi. Në seancën e djeshme mësohet se Admir Dervishi ka qenë krejt i qetë dhe nuk ka shfaqur shenja të emocionalitetit edhe pse ka përmendur në një moment se është i penduar. Në anën tjetër, i vetmi moment kur 29vjeçari nuk është ndjerë mirë ka qenë ai kur janë përmendur dy fëmijët e tij.
Vrasja
Prokuroria tha dje në Gjykatë se nga aktet e referuara në Prokurorinë për Krime të Rënda rezulton se në mëngjesin e datës 06.04.2016, Admir Dervishi, efektiv i Gardës së Republikës, pas një konflikti të mëparshëm që ka pasur me bashkëshorten e tij, Ida Dervishi, gjatë kohës që kanë qenë në ambientet e banesës së tyre (të marrë me qira) në Rrugën e Qelqit, në Kombinat, Tiranë, ka nxjerrë pistoletën e shërbimit që mbante me vete dhe ka qëlluar disa herë në drejtim të bashkëshortes së tij, duke i shkaktuar asaj vdekjen e menjëhershme. Pas kësaj, shtetasi Admir Dervishi ka njoftuar organet e policisë dhe ka pritur në vendin e ngjarjes deri në momentin e mbërritjes së tyre. Prokuroria tha se nga këqyrja e vendit të ngjarjes u sekuestruan në cilësinë e provës materiale: Një armë pistoletë kalibri 7.62 mm, tre fishekë kalibri 7.62 mm, dy predha, katër gëzhoja model 54, kalibri 7.62 mm, një këmish predhe. Në lidhje me ngjarjen është pyetur Admir Dervishi, i cili ka pranuar autorësinë e kryerjes së veprës penale, duke treguar në mënyrë të detajuar edhe kronologjinë, por edhe motivet që e kanë shtyrë në kryerjen e kësaj vepre penale.
