Efektivi Erjon Goxhara, i cili plagosi me armë zjarri drejtorin e Entit Rregullator të Energisë, Lorenc Kostën, ka dalë këtë të premte para togave t zeza për tu njohur me masën e sigurisë.
Siç shihet dhe në pamjet e siguruara nga mediat Goxhara shfaqet mbrapa “kafazit të qelqtë” i penduar.
Kujtojmë se Erjon Goxhara u vetëdorëzua dy ditë më parë në Drejtorinë Vendore të Policisë së Tiranës, së bashku me armën e shërbimit me të cilën qëlloi 45-vjeçarin.
- Si ndodhi plagosja?
Ngjarja e rëndë ndodhi rreth orës 14:00 , të 19 gushtit 2024 në zonën e “Komunës së Parisit”. Efektivi qëlloi me 5 plumba drejtorin e Entit Rregullator të Energjisë, Lorenc Kostën, pasi ky i fundit kishte marrëdhënie intime me bashkëshorten e Goxharës.
Erjon Goxhara ka pohuar para efektivëve se nuk ishte qëllimi i tij që të vriste Kostën, për këtë arsye e kishte qëlluar me armën e shërbimit në pjesët e poshtme të trupit.
Në dëshminë e siguruar nga mediat, efektivi ka treguar dhe rrjedhën e ngjarjes. Ai bëri me dije se pak para se të qëllonte me armë Kostën, ai së bashku me vajzën ishin duke drekuar në një “fast food” në zonën e “Komunës së Parisit”.
Sipas asaj që efektivi deklaroi në momentin që ishte në shoqërinë e vajzës, drejtori i Entit Rregullator të Energjisë e kishte provokuar duke kaluar para tavolinës së tyre.
Madje, Goxhara thotë se Kosta i kishte thënë edhe se “nuk ke çfarë më bën se unë të heq nga puna”.
“Ndodhesha tek Komuna e Parisit me time bijë, ishim ulur në një sufllaqe. Para tavolinës sonë kaloi Lorenc Kosta dhe më provokoi. Kaloi dy herë para tavolinës sime. Ai më ngacmonte gjithmonë që përballeshim dhe më thoshte s’më bën dot gjë mua sepse unë të heq nga puna. Në përballjen e fundit nuk durova më dhe e qëllova. Nuk kam dashur ta vras prandaj qëllova poshtë. Pas ngjarjes kam telefonuar tim bir dhe e kam takuar. Ikëm bashkë me taksi për në Fresk. Aty jam përballur me një polic civil i cili më thirri me emër dhe më tha të qëndroj duke më nxjerrë armën. Unë i thashë më mirë vras veten sesa të dorëzohem dhe jam larguar në drejtim të Dajtit derisa vendosa të vetëdorëzohem”, mësohet të ketë thënë efektivi i Policisë.
