Është vetëdorzëuar në Policinë e Tiranës efektivi Erjon Goxhara, 46-vjeç, i cili mesditën e së hënës plagosi në zonën e Komunës së Parisit, 45-vjeçarin Lorenc Kosta.
Lajmin e kanë konfirmuar autoritetet policore, teksa Goxhara është dorëzuar bashkë me armën e shërbimit me të cilën ka kryer krimin.
“Në vijim të informacionit të dhënë më datë 19.08.2024, për ngjarjen e ndodhur në afërsi të një marketi në rrugën “Tish Daija”, sot, rreth orës 17:00, është vetëdorëzuar në Drejtorinë Vendore të Policisë Tiranë, së bashku me armën e shërbimit me të cilën ka kryer veprën penale, shtetasi Erjon Goxhara, 46 vjeç.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.” – thuhet në njoftimin e bluve të kryeqytetit.
Erjon Goxhara, me detyrë efektiv në Drejtorinë Vendore për Kufirin dhe Migracionin në Tiranë, akuzohet për kryerjen e veprave penale “Vrasja me paramendim”, mbetur në tentativë.
Motivi i krimit dyshohet se ka qenë tradhtia, pasi Erjon Goxhara kishte zbuluar se bashkëshortja e tij kishte nisur një lidhje jashtëmartesore me kolegun e saj të punës, Lorenc Kostën, edhe ky i martuar.
Historia jashtëmartesore duket se ka marrë jetë në ambientet e punës, pasi Kosta është inxhinier elektrik te Enti Rregullator i Energjisë, i njëjti institucion shtetëror, ku punon juriste edhe bashkëshortja e efektivit.
Romancën e gruas së tij me 45-vjeçari mësohet se efektivi Erjon Goxhara e kishte marrë vesh që në muajin Korrik, pasi kishte kërcënuar në telefon Lorenc Kostën.
Paraditen e të hënës, Lorenc Goxhara ka patur një debat të ashpër me bashkëshorten e tij dhe më pas ka shkuar në zonën e Komunës së Parisit ku banonte i plagosurit. Efektivi e ka pritur deri sa ka dalë 45-vjeçari nga banesa dhe më pas ka shkuar e ka qëlluar disa herë me plumba në këmbë, para një marketi, në afërsi të rreth-rrotullimit.
“Të mësosh që mos të futesh më në familjet e të tjerëve dhe as ti hash djersën e tjetrit” – kanë qenë fjalët që Goxhara i ka drejtuar Kostës gjatë momentit që e ka plagosur.
Më pas ai e ka filmuar të plagosurin me celular dhe ia ka dërguar kunatit të tij, po ashtu efektiv policie, ku i ka treguar për krimin. Më pas ai ka telefonuar të birin dhe pasi e ka marrë në banesë, janë arratisur më pas të dy drejt zonës së Freskut, duke i shpëtuar efektivëve të Policisë.
Pas dy ditësh, Goxhara është vetëdorëzuar në Policinë e Tiranës për t’u përballur me drejtësinë.
Në dëshminë e dhënë për grupin hetimor, bashkëshortja e Erjon Goxharës ka deklaruar se bashkëshorti e akuzonte për tradhti dhe për shpërdorim të shumave të mëdha parash të cilat nuk i kishin depozituar në bankë, por i mbanin në banesë. Ajo ka pranuar tradhtinë para grupit hetimor, por sipas saj, ka ndodhur vetëm një herë.
