Ministri për Evropën dhe Punët e Jashtme, Ditmir Bushati gjatë intervistës me Zërin e Amerikës është pyetur edhe për ecurinë e marrëveshjeve me Greqinë.
Në lidhje me çështjen çame, Bushati vuri në dukje se qeveria e ka përfshirë prej vitit 2013 në programin politik, por mënyra se si konceptohet nga dy shtetet është e ndryshme.
“Çështja çame është e përfshirë në programin politik të qeverisë nga 2013. Mënyra si konceptohet kjo çështje është e ndryshme. Kjo është një çështje e lirive dhe e të drejtave themelore të njeriut. Është një çështje që ka të bëjë me përgjegjësinë individuale, e të drejtave pronësore. Është një çështje që ka të bëjë edhe me të drejtën e kujtesës me atë që ka ndodhur. Ne nuk duhet të mbetemi peng të historisë, por të gjejmë rrugë që zbusin plagët e të kaluarës”, tha Bushati.
