Kampioni olimpik i 100 metrave, Noah Lajls, nuk arriti të dominonte edhe në disiplinën tjetër të shpejtësisë. Në garën e 200 metrave, ai u rendit vetëm i treti, pas fituesit Letsil Tebogo dhe amerikanit Bednarek që fitoi argjendin.
Arsyeja e zhgënjimit të Lajls u zbulua pas garës, ku ekipi i Shteteve të Bashkuara njoftoi se atleti kishte Covid. Sprintieri vendosi të zbriste në pistë pavarësisht se ishte i infektuar dhe arriti të fitonte medaljen e bronzit.
Për shkak të gjendjes jo të mirë shëndetësore dhe sforcos fizike, Noah Lajls qëndroi për shumë minuta i shtrirë në pistë pas garës. Për ta ndihmuar të largohej, stafi mjekësor përdori një karrocë me rrota. Në anën tjetër, Tebogo u bë afrikani i parë që triumfon në Olimpiadë në garën e 200 metrave. Ai i dhuroi gjithashtu Botsuanës medaljen e parë të artë olimpike.
