Medalistja e argjendtë, Distria Krasniqi dhe ajo e bronztë, Laura Fazliu, së bashku edhe me sportistët e tjerë qe përfaqësuan Kosovën në Lojërat Olimpike në Paris, Akil Gjakova, Loriana Kuka, Hana Beiqi dhe Donjeta Sadiku janë mirëpritur nga qindra qytetarë në sheshin “Xhorxh Bush” në Prishtinë.
Para të pranishmëve foli kryeministri i Kosovës, Albin Kurti, pasi shprehu falenderime për sportistët për sukseset këtë vit kërkoi punë për ëndrra të tjera e suksese të reja.
“Këto rezultate nuk janë të rastësishme, por me punë krijuam kampionë olimpikë e do te vijojmë të krijojmë kampionë në të ardhmen”, tha Kurti.
Ndërsa trajneri Driton Kuka, i cili i solli Kosovës pesë medalje në vetëm tri Lojëra Olimpike, u shpreh se e veçanta e sportistëve të xhudos është vetëm puna.
“Ne do të vazhdojmë të punojmë dhe medalja e 6, 7, 8 e të tjera do të vijnë sepse kemi të rinj qe duan te bëjnë krenarë Kosovën”, tha Kuka.
