Kryeministri Albin Kurti qëndroi të premten në veri të vendit. Ai vizitoi komunën e Leposaviqit me rastin e përurimit të rikonstruksionit në nënstacionit policor në fshatin Soqanicë të kësaj komune. Kurti potencoi se përurimi i këtij nënstacioni policor është kontribut i shtetit për qytetarin nëpërmjet sundimit të ligjit dhe paqes e sigurisë për të gjithë.
“Kur ka këso kushte kaq të mira për policinë sigurisht që kjo reflektohet drejtpërsëdrejti edhe në cilësinë e shërbimeve që jepen për qytetarët pa dallim. Policia këtu do të jetë multietnike dhe ajo do t’i shërbejë qytetarëve pa dallim etnie, ngjyre, moshe, gjinie apo religjioni”, tha Kurti.
Ministri i Punëve të Brendshme, Xhelal Sveçla, tha se nuk ka dyshim që me kushte të reja policia do të jetë më efikase në ruajtjen e sovranitetit dhe integritetit territorial të Republikës.
“Jam i bindur që siç edhe deri tani që Policia e Kosovës me efikasitet, me përkushtim të pashoq do të kryejë detyrat e saj në të mirë të komunitetit, ndaj sovranitetit, integritetit territorial të Republikës së Kosovës”, deklaroi Sveçla.
Falënderime për krijimin e kushteve pati drejtori i policisë Gazmend Hoxha, ndërsa kryetari i Leposaviqit, Lulzim Hetemi paralajmëroi ndërtimin edhe të nënstacioneve të tjera policore në komunën e tij.
“Kemi edhe plane të tjera p.sh. nënstacioni në qytezen e Leshakut, edhe atje së shpejti do të ndërtohet prej themeleve kështu që kushtet po bëhen edhe më të mira për qytetarët dhe Policinë e Kosovës”, tha Hetemi.
Lista Serbe përmes një komunikate reagoi duke thënë se nënstacioni policor është i jashtëligjshëm dhe synon të provokojë tensione të reja në veri dhe të shtojë presionin ndaj serbëve.
Ndryshe nënstacioni në Soqanicë me rreth 75 metra katrorë ka tri dhoma dhe dy banjo ndërsa i gjithë investimi ka kushtuar mbi 46 mijë euro.
