Matias Soule është zyrtarisht futbollist i Romës. Argjentinasi 21-vjeçar mbërriti në kryeqytet këtë të martë dhe kreu testet mjekësore, teksa ishte pikërisht klubi i Juventusit, që nëpërmjet një komunikate zyrtare, njoftoi edhe marrëveshjen për shitjen e tij te verdhekuqtë.
I huazuar sezonin e kaluar te Frosinone, ku në 39 ndeshje shënoi 11 gola dhe dha tre asiste, Soule joshi jo pak De Rossin, që e kërkoi me ngulm, ndaj drejtuesit e Romës i plotësuan dëshirën, duke e sjellë në “Olimpico”.
Për kartonin e Soule Roma do të paguajë rreth 26 milionë euro kesh, plus 4 të tjera në formë bonusi, ndërsa sulmuesi i talentuar 21-vjeçar do të firmosë kontratë 5-vjeçare me klubin kryeqytetas.
Soule do të ketë mundësinë të luajë përkrah një tjetër argjentinasi si Paulo Dybala, me këtë të fundit që ishte i pari që i uroi mirëseardhjen në rrjetet sociale.
