Elbasani duket se e ka marrë seriozisht forcimin e ekipit për të bërë një paraqitje sa më dinjitoze në elitë, ku si synim kanë kapjen e një prej 4 vendve të para për të luajtur në finalet e “Final Four”.
Pas afrimeve të lojtarëve si Kristian Dros, Emiljano Mustës, Bruno Lulajt apo ish-mesfushorit të kombëtares, Kristi Qoses, ditën e sotme Elbasani ka zyrtarizuar edhe afrimin e mbrojtësit të majtë të Vllaznisë, Esin Hakajt.
Lajmi është bërë i ditur nga klubi verdheblu, nëpërmjet një postimi në rrjetet sociale. Hakaj ishte në negociata prej kohësh me Elbasanin dhe falë këmbënguljes së drejtuesve të klubit, u bë e mundur arritja e marrëveshjes mes palëve.
Elbasani bëhet kështu stacioni i radhës për mbrojtësin shkodran, që në të shkuarën ka qenë pjesë e Vllaznisë, Partizanit e Teutës dhe me eksperiencën e tij pritet të jetë një vlerë e shtuar për verdheblutë në Kategorinë Superiore.
Vlen të theksohet fakti se “timoneri” i Elbasanit në Kategorinë Superiore do të jetë tekniku italian Roberto Bordin, ish-trajneri i Moldavisë dhe i Sherif Tiraspol.
“Esin Hakaj është verdheblu.
Esin Hakaj vjen në Elbasan pas 3 sezonesh me ekipin e Vllaznisë. Ai ka pasur eksperienca të mëparshme me skuadra si Partizani dhe Teuta. Hakaj afrohet në familjen verdheblu për të përforcuar krahun e majtë të mbrojtjes.”, ka shkuar klubi i Elbasanit në prezantimin e Hakajt.
View this post on Instagram
