Mirlind Daku i la pas polemikat pas sfidës ndaj Kroacisë, për të cilin mori edhe pezullimin prej 2 ndeshjesh nga UEFA, ndërsa është kthyer te Rubin Kazan, në elitën e futbollit rus.
Klubi nga Kazani vërtet vendosi ta gjobiste sulmuesin “kuqezi”, por nga ana sportive ka vlerësimin më të lartë për shqiptarin dhe këtë e tregon fakti se Daku do të ketë edicionin e ardhshëm fanellën me numrin 10.
Ishte vetë sulmuesi 26-vjeçar që botoi në faqen e tij në Instagram fotot e fanellave me numrin 10, atë me ngjyrë të bardhë, dhe të gjelbër, teksa sezonin e shkuar mbante atë me numrin 19.
Daku ishte padyshim lojtari më i mirë i klubit sezonin e shkuar në Premier Ligën ruse, ku shënoi 10 gola dhe shërbeu 4 asistë, duke ndihmuar ekipin të realizonte me lehtësi objektivin e mbijetesës në elitë.
Nuk dihet se ku do të jetë e ardhmja e yllit të kombëtares shqiptare, pasi për të ka interesim, ndonëse ai ka premtuar se në Rusi do të luajë vetëm për Rubin Kazan.
View this post on Instagram
