Pas përfundimit të mbledhjes së Grupit Parlamentar të PD, Gazment Bardhi, ka treguar për media detaje nga ajo se çfarë është diskutuar në mbledhje.
Bardhi tha Grupi Parlamentar ka miratuar propozimin e kolegëve që janë përfaqësues të opozitës në grupin e dialogut sa i takon reformës zgjedhore.
Sipas Bardhit, në fokus të diskutimeve ishte depozitimi i propozimeve ligjore të opozitës sa i takon zbatimit të vendimit të Gjykatës Kushtetuese për votën e shtetasve shqiptarë që jetojnë jashtë vendit.
“Çështja që mori pjesën dërmuese të diskutimeve, grupi parlamentar ka miratuar propozimin e kolegëve që janë përfaqësues të opozitës në grupin e dialogut sa i takon reformës zgjedhore. Në fokus të diskutimeve ishte depozitimi i propozimeve tona ligjore sa i takon zbatimit të vendimit të Gjykatës Kushtetuese për votën e shtetasve shqiptarë që jetojnë jashtë vendit.
Për ne ajo është një çështje prioritare, ka gjithë mbështetjen e grupit të PD dhe besoj që zgjidhja që kanë dhënë përfaqësuesit tanë përmes draftit të prezantuar sot në grupin e dialogut është zgjidhja më e mirë dhe që siguron votë për secilin qytetar shqiptar që jeton jashtë territorit të Republikës së Shqipërisë. Kolegët ngritën edhe çështje që do të mbahen në konsideratë gjatë ditëve që kanë mbetur nga ky sesion”, tha Bardhi.
