Sekretari i Mbrojtjes Jim Mattis paralajmëroi presidentin sirian Bashar Assad të premten se SHBA është e gatshme të ndërmarrë veprime të tjera ushtarake kundër Sirisë dhe të godasë sërish me rakea, nëse ai nuk merr parasysh mesazhin e sulmit të ndërmarrë prej SHBA dhe aleatëve pak javë më parë.
“Do të ishte i keq-këshilluar nëse do të shpërfillë deklaratën e bashkësisë ndërkombëtare dhe ne jemi të gatshëm për të ndërmarrë sulme shtesë në të ardhmen,” tha Mattis gjatë një takimi me homologun e tij japonez në Pentagon.
Mattis tha se ai ka parë që ka pasur mbështetje universale për atë që e quajti “sulmin e urryer, por të nevojshëm”.
Sulmet me raketa u kryen nga Shtetet e Bashkuara, Britania dhe Franca të shtunën e para dy javëve.
Ministri japonez i Mbrojtjes Itsunori Onodera tha se besonte që sulmi tregon vendosmërinë e bashkësisë ndërkombëtare në çështjen e armëve të shkatërrimit në masë.
“Unë mendoj se kjo i dha një mesazh të caktuar edhe Koresë së Veriut,” tha Onodera.
