Kosova ka 1 586 659 banorë rezidentë; prej tyre 50,1% janë meshkuj ndërsa 49,9% janë femra. Në krahasim me vitin 2011 ka një tkurrje prej rreth 200 mijë banorësh. Këto janë rezultatet paraprake të censit që u zhvillua për 7 javë në territorin e Kosovës, ndërsa regjistrimi online për diasporën po vijon.
Prishtina me mbi 227 mijë banorë, Prizreni me mbi 147 mijë dhe Ferizaj me mbi 109 mijë janë komunat më të populluara. Fushë-Kosova ishte komuna që kishte rritjen më të madhe të popullsisë, ndërsa rënien më të madhe Kamenica. Mosha mesatare është rritur me mbi 4 vjeç në krahasim me regjistrimin e vitit 2011 dhe tani është 34,8.
Rezultatet u vlerësuan shumë të rëndësishme dhe të nevojshme për të adresuar në mënyrë të saktë nevojat e të gjithë qytetarëve.
Kryeministri i Kosovës, Albin Kurti, tha: “Nxjerrja e të dhënave të shumta, të plota dhe të sakta do t’u mundësojë të gjithë shfrytëzuesve dhe vendimmarrësve, duke filluar nga niveli lokal e qendror, por edhe për organizatat donatore e investitorët prospektivë për orientimin e politikave dhe shërbimeve më të mira për qytetarët”.
Në komunat veriore me shumicë serbe Zubin Potok, Zveçan, Leposaviq e Mitrovicë e Veriut pati një bojkotim të procesit në masë të madhe. Ndërsa në komunat e tjera me shumicë serbe në pjesën tjetër të vendit procesi ka shkuar mirë përveç në Novobërdë. Megjithatë, Agjencia e Statistikave tha se e ka mostrën e duhur për të nxjerrë rezultatin final edhe për këto komuna: “ASK e ka një teknologji se cilat objekte e cilët persona janë regjistruar dhe ata që nuk janë regjistruar dhe do të punojmë gjatë këtyre muajve. Ata që nuk janë regjistruar ende figurojnë me të kuqe, që nuk është bërë vlerësimi dhe ne do të angazhohemi gjatë kësaj periudhe dhe do ta bëjmë atë nën regjistrim për komunën e Novobërdës edhe për komunat në veri me të dhënat preliminare”.
Duke qenë se regjistrimi ishte obligim ligjor për ata që e kanë bojkotuar do të ketë gjoba. Lista Serbe ka bërë thirrje publike në drejtim të serbëve të Kosovës për të mos e kryer regjistrimin.
Avni Kastrati, nga Agjencia e Statistikave të Kosovës, shprehet: “Do të shpallim gjobat duke filluar prej atyre që kanë dalë publikisht kundër regjistrimit. A do gjobitën serbët e veriut? Dikush tjetër ka bërë thirrje në emër të atyre, sigurisht dënimi shkon te Lista Serbe”.
Në rezultatet paraprake nuk u dhanë të gjitha të dhënat si ndarja etnike e popullisë, religjioni, edukimi, punësimi apo edhe të dhënat për dëmet e luftës. Rezultatet përfundimtare pritet të publikohen në muajin dhjetor. / A2 CNN
