“Iniciativa e Demokratëve Euroatlantik”, do të jetë emri i partisë më të re që do të krijojnë grupi i Lulzim Bashës, të cilët humbën vulën e Partisë Demokratike me vendim të Gjykatës së Apelit më 11 Qershor.
Lajmi konfirmohet nga burime mediatike, teksa partia e re pritet të shpallet brenda kësaj jave. Mësohet se kjo parti politike pritet të themelohet nga disa deputetë dhe ish-funksionarë të PD-së.
Shkurtimisht kjo parti do të quhet “IDE”, ku duket se Lulzim Basha është frymëzuar për emrin nga lëvizja e Fatbardh Kadillit, në kohën kur ky i fundit garonte përballë Bashës për kreun e Partisë Demokratike dhe shpalli “Iniciativën Demokratike”, ose ndryshe IDE-n.
Burime bëjnë me dije se partia e re e grupit të Lulzim Bashës nuk do të ketë një kryetar, por do të drejtohet me kolegjialitet.
Pjesë e kësaj partie mësohet se do të jetë edhe vetë Fatbardh Kadilli, i cili e ka kritikuar prej vitesh Lulzim Bashën, madje edhe kur Partia Demokratike nuk ishte e përçarë në dy grupime të mëdha. Duket se ai do t’i lërë mënjanë kritikat dhe do të ndjekë të njëjtën rrugë si Edvin Kulluri.
Pjesë e kësaj force politike pritet të jenë edhe emrat si Enkelejd Alibeaj, Edvin Kulluri, Roland Bejko, Rezart Kthupi, Agron Kapllanaj dhe Gjergj Hani.
Ndërkohë, burime bëjnë me dije se momentalisht Lulzim Basha do të qëndrojë zyrtarisht jashtë kësaj partie të re. Kjo për shkak se ai vetë do të vijojë betejën ligjore me Sali Berishën dhe Gazment Bardhin për logon e vulën e Partisë Demokratike, ku do të presë rekursin në Gjykatën e Lartë.
Drejtimi me kolegjialitet do të jetë i përkohshëm deri në zgjedhjet parlamentare të vitit 2025. Duket se kjo do të jetë një taktikë për Lulzim Bashën, i cili do të shmangë përgjegjësitë nga humbja dhe do t’i bashkohet partisë së re, pasi të jetë mbyllur përfundimisht dhe çështja e vulës së PD-së.
Gjithsesi, mbetet ende mister nëse Lulzuim Basha do të jetë pjesë e listave të kandidatëve për deputet të kësaj partie në zgjedhjet e vitit 2025 apo jo. Dhe gjithashtu, nuk dihet nëse kjo parti e re a do të futet në zgjedhje në koalicion me parti të tjera.
