Grupi Parlamentar i Partisë Socialiste ka zhvilluar mbledhjen e javës këtë të martë, ku mësohet se kryetari i grupit Bledi Çuçi i ka informuar deputetë socialist mbi axhendën për seancat që kanë mbetur deri në përfundim të këtij sesioni parlamentar.
Në seancën plenare të ditës së enjte, mësohet se mes çështjeve të tjera të rendit të ditës, pritet të ketë edhe një interpelancë me ministren e Shëndetësisë dhe Mbrojtjes Sociale, Albana Koçiu, të kërkuar nga një grup deputetësh të opozitës, lidhur me skandalin në spitalin Onkologjik në QSUT, ku mjekët kishin krijuar një skemë abuzive të transfermit të pacientëve me kancer drejt klinikave private.
Gjithashtu pritet të prezantohen edhe raporti vjetor i Komisionit Qendror të Zgjedhjeve, raporti mbi veprimtarinë e Komisionerit për të Drejtën e Informimit dhe Mbrojtjen e të Dhënave Personale, si dhe raporti vjetor për veprimtarinë e Komisionerit për Mbrojtjen nga Diskriminimi.
Në vijim, gjatë mbledhjes së grupi të PS, pati diskutime të tjera për çështje të ndryshme të ngritura nga deputetët e pranishëm.
