Gjermania ka arritur të kualifikohet në fazën çerekfinale të “Euro 2024” duke eliminuar me rezultatin 2-0 Danimarkën.
Dy gola, në pjesën e dytë i dhanë fitoren djemve të Julian Nageslmann, me Kai Havertz, i cili çeli siparin e golave me anë të një 11-metërshi, në minutën e 53’-të të sfidës dhe vetëm 15 minuta më vonë ylli i Bayern Munich, Jamal Musiala tundi rrjetën e danezit Schmeichel, për të siguruar fitoren e madhe.
Mirëpo, loja nuk ishte edhe aq e qetë, pasi në të u anulluan plot tre gola, dy për “Pancerat”, një në minutën e 4’-t dhe një në fundin e sfidës, si dhe u anullua një gol i “Vikingëve”, në minutën e 48’-të të sfidës, me këtë rrjetën e fundit që mund të ndryshonte goxha fatet e sfidës, nëse nuk do të kishte një pozicion jashtë lojë gjatë ndërtimit të aksionit.
Për t’u përmendur është fakti që në minutën e 36 ndeshja u ndërpre për 24 minuta, kjo pasi shiu i rrëmbyer i shoqëruar me shkarkesa elektrike mbi stadium bëri që arbitri anglez Michael Oliver t’i dërgonte skuadrat në dhomat e zhveshjes, për të rinisur gjithçka pas qetësimit të situatës.
Pas 90 minutave Gjermania merr biletën e dytë pas Zvicrës për në çerekfinalet e Euro 2024. Gjermanët do përballen me fituesin e çiftit Spanjë – Gjeorgji.
