Kosovën ka arritur ta shohë vetëm me sy, pasi tokën nuk ia shkel dot. Drejtori i të ashtuquajturës zyrë për Kosovën në qeverinë e Serbisë, Petar Petkoviç, thotë se qeveria e Prishtinë ia ka ndaluar hyrjen për festën Vidovdan.
Përmes një deklarate, ai pretendon se për një vit e gjysmë është penguar të vizitojë Kosovën dhe të marrë pjesë në ato që i konsideron si festat më të rëndësishme të serbëve dhe për t’u dhënë atyre ndihma.
Petkoviç tenton që ta dramatizojë çështjen duke thënë se me këtë, kryeministri Kurti po tregon se nuk është i interesuar për asnjë normalizim të marrëdhënieve, pavarësisht takimit në Bruksel.
“Ndonëse vizita ishte paralajmëruar në përputhje me të gjitha marrëveshjet e vlefshme dhe marrëveshjen për lirinë e lëvizjes, dhe qëllimi ishte ekskluzivisht i karakterit fetar, me vizitë në familje të rrezikuara sociale, Kurti e ndaloi vizitën dhe me këtë i shkeli të gjitha marrëveshjet e arritura në negociatat e Brukselit”, tha Petar Petkoviç.
Ministria e jashtme e Kosovës konfirmoi për Radion Evropa e Lirë se nuk ia ka pranuar kërkesën Petkoviçit për të hyrë në territorin e shtetit. Një zyrtar thotë se vendimi është marrë për shkak të shkeljeve të marrëveshjes për vizitat e dyanshme, deklaratave propagandistike dhe për shkak të gjuhës së tij provokuese ndaj Kosovës dhe qytetarëve të saj.
