Dy shqiptarë janë dënuar me nga 2 vite e 4 muaj burgim nga Gjykata e Kurorës së Northampton në Britaninë e Madhe pasi u kapën në një fermë kanabisi.
Bëhet fjalë për 27-vjeçarin Fabrizio Zika me profesionin hidraulik dhe 28-vjeçarin Elmaz Idrizi, punëtor ndërtimi, të cilët u kapën në flagrancë nga policia në një shtëpi tre katëshe në Headlands, ku ishte kultivuar kanabis me vlerë 415 mijë paund.
Sipas mediave britanike, shqiptarët kanë dëshmuar se arsyeja e përfshirjes në këtë veprimtari kriminale ishte për të shlyer borxhet që u kishin bandave të cilët i kanë ndihmuar për të hyrë ilegalisht në tokën angleze.
Zika dhe Idrizi u kapën brenda “shtëpisë së barit” në 23 maj të këtij viti rreth orës 09:00 të mëngjesit.
Në “shtëpinë e barit” për të cilët kujdeseshin dy shqiptarët policia gjeti 488 bimë kanabisi, si dhe mjete të shumta për rritjen në mënyrë artificiale të bimëve narkotike.
Përllogaritet se këto bimë kanabisi do të prodhonin për konsum rreth 83 kilogramë kanabis.
