Aldo Teqja mund të konsiderohet futbollisti më i ri i Dinamos. Klubi kryeqytetas ka arritur marrëveshjen me portierin nga Tirana, i cili duke nisur nga sezoni i ardhshëm do të jetë pjesë e 18 herë kampionëve të Shqipërisë.
Pas zyrtarizimit të Bruno Ditës, “gardiani” 29-vjeçar është afrimi i radhës tek ekipi i Dritan Mehmetit. Përforcim që do shtojë cilësinë dhe sigurinë mes shtyllave në radhët e skuadrës kryeqytetase.
Në sezonin e fundit, Teqja ishte pjesë e Flamurtarit në Kategorinë e Parë, skuadër me të cilën luajti 31 ndeshje në total.
Me kuqezinjtë vlonjatë që nuk u ngjitën dot në Superiore, teksa u mundën në finalen e “Play-Off”-it nga Laçi i Armando Cungut.
Portieri ka një përvojë të madhe, teksa në të shkuarën ka luajtur për Skënderbeun, Partizanin dhe Bylisin. Ndërkohë që jashtë vendit është aktivizuar me Anorthosis në Qipro.
Dinamo ka nisur punën për sezonin e ri dhe po ndërton një ekip që të pretendojë vendet e para në renditje. Blutë u renditën në vendin e shtatë në sezonin që lamë pas, vetëm 4 pikë larg zonës “Final 4”.
