Kroacia ka humbur “pjesë” para përballjes me Shqipërinë, që do të luhet ditën e nesërme në orën 15:00 në stadiumin e Hamburgut.
Mesfushori me tipare sulmuese Nikola Vlasic ka pësuar një dëmtim dhe është larguar nga grumbullimi, duke humbur pjesën tjetër të Kampionatit Evropian në Gjermani. Lajmi është bërë me dije nga vetë federata kroate.
Futbollisti i Torinos ka pësuar dëmtim gjatë stërvitjes dhe sot iu nënshtrua një ekzaminimi me rezonancë magnetike, i cili zbuloi një këputje të lehtë të muskujve.
Trajneri Zlatko Dalic, në marrëveshje me Vlasic-in dhe stafin mjekësor, vendosi që Nikola të largohet nga kampi i kombëtares, pasi dëmtimi i tij nuk e lejon të garojë për ndeshjet e Euro-s.
“Nikola investoi shumë mund dhe energji për të ndihmuar kombëtaren në Euro dhe për këtë më vjen shumë keq për këtë dëmtim muskulor që pësoi”, tha Dalic.
“Më vjen jashtëzakonisht keq që nuk do të mund ta ndihmoj skuadrën gjatë këtij Euro për shkak të këtij lëndimi. Unë vërtet bëra gjithçka të isha gati, por nuk ia dola. Falënderoj trajnerin dhe stafin për që besuan tek unë. I uroj ekipit fat dhe jam i sigurt se do të arrijnë suksese në këtë EVropian. Unë do jem tifozi më i madh juaji”, deklaroi Vlasic para se të largohej nga grumbullimi.
Kroacia pritet të mos shtojë një lojtar tjetër në listën e saj pavarësisht dëmtimit të sulmuesit të Torino-s.
