Agjencia e Mbikëqyrjes Policore ka arrestuar një efektiv policie të komisariatit të Himarës të shpallur në kërkim, pasi Gjykata e Vlorës i kishte caktuar masën e sigurisë “arrest me burg”.
Në pranga është vënë efektivi Festim Xhafaj, i cili akuzohet për kryerjen veprave penale “Përndjekje”, “Dhuna në familje”, “Mosbindje ndaj urdhrit të punonjësit të policisë së rendit publik”, si dhe “Prodhimit, mbajtjes, blerjes apo shitjes pa leje të armëve të ftohta”.
Festim Xhafaj akuzohet se ka përndjekur një kolege në komisariatin e Vlorës. Përndjekja ka qenë e vazhdueshme ndërsa e fundit ka qenë më 3 maj kur e ka përndjekur në rrugën “Transballkanike”.
Sipas një njoftimi të AMP-së në datën 10 maj kur dhe Xhafaj u shpall në kërkim, efektivi e ka përplasur edhe makinën e saj. Pas kësaj, efektivi është larguar me shpejtësi, ndërsa mjetin e ka braktisur në Vlorë. Nga këqyrja e automjetit u gjetën dhe u sekuestruan në cilësinë e provës materiale 2 armë të ftohta (thikë e biçak).
Burime nga grupi i hetimit bëjnë me dije se Festim Xhafaj dhe punonjësja e policisë ishin në një lidhje romantike prej disa kohësh. Kohët e fundit dy të rinjtë kishin patur debate dhe zënka. Pas sherrit që kanë bërë me njeri tjetrin, efektivja është larguar ndërsa Xhafaj e ka ndjekur nga mbrapa, si dhe e përplasi me makinën e tij.
Punonjësja e policisë ka dhënë dëshminë në polici, ku ka treguar problemet që ka patur se fundmi me të dashurin e saj.
