Për analistin Preç Zogaj kandidimi i Fredi Belerit si eurodeputet nga partia qeverisëse e kryeministrit Mitsotakis ishte një përgjigje ndaj arrestimit të tij para zgjedhjeve vendore, që u përkthye si sfidë. Zogaj tha në emisionin “Të Paeskpozuarit” në MCN TV se kryeministri grek u investua vetë personalisht bashkë me enturazhin e tij, me kryetarë bashkish të fuqishëm që i kanë humbur tani, por që kanë ardhur, kanë protestuar për rastin Beleri dhe e shndërroi Belerin në një simbol.
“Qeveria greke është ndjerë e sfiduar me atë që ndodhi me Belerin në zgjedhjet në Himarë, pra arrestimi i tij pak ditë përpara votimeve, mbajtja e tij në burg, mosshpallja e tij fitues, dhe gjithë procedurat nënligjore që kanë ndjekur, nga një shkallë në tjetrën.
Rasti Beleri është përjetuar dhe këtë e themi, e kemi thënë gjithmonë nga Greqia, si një sfidë që i është bërë edhe personalisht kryeministrit. Ai është investuar vetë personalisht bashkë me enturazhin e tij, me kryetarë bashkish të fuqishëm që i kanë humbur tani, por që kanë ardhur, kanë protestuar për rastin Beleri. Pra, e shndërroi papritur, domethënë në një simbol.
Në një farë mënyre, edhe të helenizmit, gjë që është e gabuar, sepse edhe Panajoti e tha, ai nuk përfaqëson pjesën elitare.
Greqia i ktheu sfidën Shqipërisë, pra duke e kandiduar. Kërkoi një mënyrë për të dalë dhe për të shpallur përpara opinionit publik grek që ne nuk na u dëgjua fjala në asnjë përpjekje që bëmë me Ramën dhe me Tiranën për rastin e tij, por ne gjejmë një rrugë tjetër dhe kjo është një rrugë që, me sa duket, përdoret për të nxjerrë nga burgu një person që pala tjetër, qeveria greke në rastin konkret, e konsideron të burgosur politik. Në këtë rast, kërkon që edhe të investohet në favor të personit në fjalë, por kërkon që edhe të diskreditoj në një farë mënyre vendin që e ka burgosur politikisht”-tha Zogaj.
