Emri i Armando Brojës është një temë shumë e “nxehtë” e merkatos së verës. Pas shqiptarit është vënë Everton, klub i cili sipas mediave angleze është i gatshëm të paguajë 30 milionë euro për ta marrë nga Chelsea.
Broja u huazua te Fulham gjatë merkatos së janarit por eksperienca e tij atje nuk shkoi siç duhet pasi aktivizua në vetëm në 8 ndeshje dhe duke qenë se minutat i kishte me pikatore nuk arriti të shënonte asnjë gol.
Megjithatë, interesi i klubeve të huaja për 22-vjeçarin nuk është venitur. Jo vetëm Everton, pas Brojës është vënë edhe Milani.
Mediet italiane bëjnë me dije se shefi i skautizmit të “Djallit”, Moncada ka zbarkuar në Londër me shumë mundësi për të diskutuar me Chelsea-n, klubin që ka në pronësi kartonin e sulmuesit të kombëtares shqiptare, për këtë lëvizje, me Milan-n që e sheh Brojën si pasuesin ideal të Olivier Giroud.
Qëllimi i Milan-it është që ta afrojë sulmuesin 22-vjeçar me një çmim të favorshëm, duke e marrë në formë huazimi me të drejtë blerjeje për rreth 20 milionë euro në fund. Një objektiv ky i vështirë për “Djallin” pasi oferta e Everton është më e lartë.
Ndërkohë vetë Armando Broja ndodhet momentalisht në Gjermani me kombëtaren shqiptare, për ndeshjet e EURO 2024, ndërsa mbetet për tu parë se kush do të jetë klubi i ardhshëm i “bomberit” kuqezi.
