Ish-kryeministri Sali Berisha ka shpjeguar sot atë që e quajti ‘debati i markimit të naftës’, dhe çfarë ka ndodhur me të. Berisha ka komentuar nga salla e kuvendit dhe raportet me kompanine GFI, te shumeperforlur per perfshirjen ne skandalin e “Panama Papers”. Ai deklaroi se vitin e kaluar ishte qeveria Rama qe firmosi kalimin e plote te aksioneve ne emer te kompanise se Ismail Mulletit.
DEKLARATA E BERISHËS
Këto ditë ka shpërthyer një debat i madh. Debati i markimit. Që ta dini mirë. Çfarë ka ndodhur? Ne firmosëm një kontratë me një kompani kanadeze me reputacion botëror në fushën e markimit, e shënjimit dhe shënjues të vet origjinalë, patentë të saj.
Ne firmosëm, në mënyrë të veçantë që të markohej e gjithë nafta që hynte dhe prodhohej në Shqipëri. 4 milionë litra naftë pusi u hodhën në benzinatat e vendit, i kapët ju. Fillimisht i thatë jo kompanisë. Mafia e naftës e çoi në Gjykatë Kushtetuese. Gjykata Kushtetuese e gjeti në të gjitha aspektet kushtetuese dhe ligjore kontratën. A e dini se në shtator 2015 ai zotëria që do të pleqërojë me Koçon ka miratuar kalimin e aksioneve nga kompania markuese profesioniste Global Fluid Internacional tek kompania tjetër të 99,5% të aksioneve. Çakejtë e qeverisë që bërtasin poshtë e përpjetë, sesi ka ikur ajo dhe ku u dhanë aksionet, ju i dhatë aksionet. Më thonë se kjo është shkelje kontrate. Se nuk mund të ikte. Pse iku? Sepse jua ngrohu xhepin juve ai.
Pra, a i keni parë mediat tuaja se si bërtasin nga mëngjesi deri në darkë? A e dini ju që ju pranuat largimin e kompanisë Global Fluid International, markuesin dhe prodhuesin e shënjuesit të naftës? Ju mendoni që me media do ti kapërceni këto? Edhe një herë ju them, se ky operacion është kryer pasi Gjykata Kushtetuese ka vendosur, dhe në Gjykatën Kushtetuese vendimi është marrë kur GFI është 75% aksionar ndërsa kompania tjetër është 25%, po ja që kreu juaj i çmendur për para e ndryshoi situatën, u ble dhe lejoi operacionin. Pastaj merr përdor këllira e stërkëllira për të shpifur të cilët nuk e mbrojnë dot aspak.
Si përfundim, dekusarizimi i këtij Parlamenti është jetik dhe vendimtar për të ardhmen e Shqipërisë. Dekusarizimi i Parlamentit nënkupton zbatimin e ligjeve të vendit, plotësimin e ligjeve të tyre, ndaj dhe unë dhe njëherë kërkoj mbështetjen tuaj, të miratojmë ligjin “anti Olsi”. Ligji “anti Olsi” është ligji që do të ndalojë kusarët që të vjedhin pasuritë publike siç po ndodh. Ju lutem dëgjoni një statistikë shumë interesante.
Do ju jap disa të dhëna për tenderat e kompanisë të famozit Gjici: periudha shtator 2013 – dhjetor 2013 Gjici ka fituar 4 kontrata. Periudha janar 2014 – dhjetor 2014 Gjici fluturon, ka fituar 40 kontrata. Nuk do të thotë të jesh socialiste që të jesh hajdut , por kjo është faqja e zezë e socialistëve.
Vjen periudha janar 2015 – dhjetor 2015, Gjici ka firmosur 58 kontrata. Si i ka firmosur? Duke jua hequr të gjithë të tjerëve. Ky mafioz, nën rojet e të cilit vidhet banka ditën për diell, fiton nga ju, nga 6 kontrata në 2013, kur për hir të së vërtetës ishte pranë nesh sepse bënte fushatë për ne, ky tani kalon nga 6 kontrata në 58 kontrata. Po pse? Sepse paguan Edi Ramën. A ka neveri më të madhe sesa kjo.
Pjerin Ndreu, në shtator-dhjetor 2013 ka 4 kontrata. Janar 2014 – dhjetor 2014 ka 11 kontrata. Janar 2014 – dhjetor 2016 ka 16 kontrata.
Tani shohim pak Sadri Abazin, ka një emër tjetër ky aty, Sadriu është “qelibar”, sakën se fut një qindarkë nga para publike në xhep, edhe po ti ngjitet i heq rrugës. Në periudhën shtator 2013 – dhjetor 2013 nuk ka fituar ndonjë kontratë, ne periudhën janar 2014 – dhjetor 2014 ka fituar 11 kontrata. Në periudhën janar 2015 – dhjetor 2015 ka fituar 16 kontrata. Çfarë doni më. A doni ta heqim është atë ligjin për konfliktin e interesit se jemi bërë njerëzit më qesharak jo të Shqipërisë, por te planetit. Para syve tanë ndodhin të gjitha këto. Para syve tanë dhjetëfishohen e njëzetfishohen kontratat e këtyre hajdutëve. Ose të plotësojmë ligjin, ose të heqim ligjin e konfliktit të interesit. Unë them ta plotësojmë. Njeriu duhet të udhëhiqet nga besimit tek e mira dhe duhet të përiqet që çfarë është e mundur, dhe duke parë këtë batërdi, këtë njëri që nga 6 kontrata kalon ne 58 kontrata, këtë supërmafioz që vepron si lubi i papërmbajtur. Të vazhdojmë prap kështu? Nuk ka gjë më të turpshme. Vetëm parlament nuk meriton të jetë ky. Ky është një çerdhe kusarësh që përdor mandatin për të vjedhur njerëzit më të varfër të Europës.
